زانیاریی ئاڤا؛ سەرووی 10 هەزار زەوی كارت دەكرێنە تاپۆ

ئاڤا نیوز

لەپاڵ دابەشكردنی زەوی بەسەر فەرمانبەران، پرۆسەی تاپۆكردنی زەوییە كارتەكانیش لە سنووری شارەوانیی هەولێر و دەوروبەری بەردەوامە، سەرچاوەیەك لە وەزارەتی شارەوانی تایبەت بە ئاڤا ئاشكرای دەكات، پلانەكە ئەوەیە سەرووی 10 هەزار زەویی جۆری كارت، بكرێنە تاپۆ.

چیرۆكی سەرەكی: لە چوارچێوەی كارەكانی یەكەی گۆڕینی كارتی زەوی بۆ سەنەد، لە وەزارەتی شارەوانی و گەشتوگوزار، 761 كارتی زەوی لە نەخشەی كەرتی (42 كانیی قڕژاڵە) بەشی (57 ساتور)، كارەكانی تاپۆكردنیان تەواو بووە و وێنەی تۆمارەكانیان گەڕاوەتەوە وەزارەتی شارەوانی و ئێستا ئامادەن.

ئەوەی پێویستە بیزانیت: لە كابینەی نۆیەمی حكومەتی هەرێمی كوردستان، بەمەبەستی تاپۆكردنی زەوییە كارتەكان، یەكەیەكی نوێ بە ناوی 'یەكەی گۆڕینی كارتی زەوی بۆ سەنەد' لەلایەن وەزارەتی شارەوانی و گەشتوگوزارەوە هێنرا كایەوە؛ تاوەكو ئێستا نزیكەی 78 هەزار كارتی زەوی لە سنووری هەولێر و دەوروبەری تاپۆ كراون و زیاتر لە 10 هەزار كارتی دیكەش ئامادەكراون بۆ ئەوەی تاپۆ بكرێن.

لێدوانی فەرمی: سەرچاوەیەك لە یەكەی گۆڕینی كارتی زەوی بۆ سەنەد لەنێو وەزارەتی شارەوانی بە ئاڤای ڕاگەیاند، ئەو زەوییە كارتانەی لە سنووری سەرۆكایەتیی شارەوانیی هەولێر و بەڕێوەبەرایەتیی گشتیی شارەوانییەكانی هەولێر كارەكانی تاپۆكردنیان تەواو كراون و وێنەی تۆمار (تاپۆ)ـیان بۆ دەركراوە، خاوەنەكانیان دەتوانن لە بەیانییەوە سەردانی فەرمانگە پەیوەندیدارەكانی شارەوانی بكەن بۆ وەرگرتنی وێنەی تۆماری زەوییەكانیان، و دواتریش لە بەڕێوەبەرایەتییەكانی تۆماركردنی خانووبەرە و فەرمانگە و لایەنە پەیوەندیدارەكان ڕێكارەكان تەواو بكەن.

زانیاریی ئاڤا: ژمارەی كارتی زەوی سنووری شارەوانییەكان كە ئامادەكراون بۆ تاپۆكردنیان ئەمانەن:

٠ كانیی قڕژاڵە: 1600 كارتی زەوی

٠ كەرتی 92ـی شاوێس: 220 كارتی زەوی

٠ گەڕەسۆری نوێ (كەرتی باغەمرە شەهاب): 1800 كارتی زەوی

٠ عارەب كەند: نزیكەی 600 كارتی زەوی

٠ قەرەچناغە: 600 كارتی زەوی

٠ قەڵاتی نوێ: 1100 كارتی زەوی