شەش ئامێری ATM لە هەڵەبجە دادەنرێن

ئاڤا نیوز

هەژماری من بەردەوامە لە دانانی ئامێرەکانی پارەڕاکێشان لە پارێزگا و ناوچە جیاوازەکانی هەرێمی کوردستان، شەش ئامێریش لە هەڵەبجە دانران بۆ ئاسانکاری مووچە خۆران.

چیرۆکی سەرەکی: لە هەنگاوێکی نوێدا بۆ پەرەپێدانی پرۆسەی بەدیجیتاڵکردنی مووچە، ئەمڕۆ ژمارەیەک ئامێری پارە ڕاکێشان (ATM)ی تایبەت بە پڕۆژەی "هەژماری من" گەیشتنە پارێزگای هەڵەبجە،لە ئێستادا تیمەکانی "هەژماری من" شەش ئامێرییان گەیاندووەتە پارێزگاکە و بڕیارە لە چەند شوێنێکی جیاوازی ناو شاری هەڵەبجە دابنرێن.

لێدوانی فەرمی: نەجمەدین غەفور، بەڕێوەبەری بانکی هەڵەبجە، بەئاڤا میدیای ڕایگەیاند: "لە سنووری پارێزگای هەڵەبجە 35 هەزار فەرمانبەر و 14 هەزار خانەنشین هەن."

زانیاریی بەدەستهاتوو: بەپێی ئەو زانیاریانەی لە تیمی "هەژماری من"ـەوە دەست ئاڤا میدیا کەوتوون، دەستکراوە بە دانانی ئامێرەکان، چاوەڕوان دەکرێت لە مانگی داهاتووەوە، مووچەخۆران و خانەنشینانی پارێزگای هەڵەبجە بتوانن مانگانە مووچەکانیان لە ڕێگەی ئەم ئامێرانەوە وەربگرن.

ئەوەی پێویستە بیزانیت:  پێشتر ئەو فەرمانبەر و خانەنشینانەی پارێزگای هەڵەبجە کە کارتی "هەژماری من"یان وەرگرتبوو، ناچاربوون بۆ وەرگرتنی مووچەکانیان سەردانی بانکەکانی شاری سلێمانی بکەن، کە ئەمەش بارگرانییەکی زۆری لەسەر شانیان دروستکردبوو.

دانانی ئەم ئامێرانە لە هەڵەبجە وەک وەڵامێک بۆ پێداویستییەکانی ئەم ژمارە زۆرەی مووچەخۆران دێت و ئاسانکارییەکی بەرچاو لە پرۆسەی وەرگرتنی مووچەدا دەکات.