ویتکۆف: دانوستانەکانی دەوحە بە باشی بەڕێوەدەچن

ئاڤا نیوز

ستیڤ ویتکۆف نێردەی ترەمپ بۆ  ڕۆژهەڵاتی ناوەڕاست ڕایگەیاند، دانوستانەکانی دەوحە  بۆ گەیشتن بە ئاگربەست لە کەرتی غەززە بە باشی بەرەوپێش دەچن.

وێنە گەورەکە: ماوەی دوو هەفتەیە دانوستانەکانی ئیسرائیل و بزووتنەوەی حەماس لە دەوحەی  پایتەختی قەتەر، بۆ ڕێککەوتن لەسەر ئاگربەست لە کەرتی غەززە بەردەوامن، بەڵام تاوەکوو ئێستا هیچ گۆڕانێک بە ئاراستەی ئاگربەست بە دی نەکراوە.

لێدوانی فەرمی: ستیڤ ویتکۆف، نێردەی ترەمپ بۆ ڕۆژهەڵاتی ناوەڕاست ڕایگەیاند: دانوستانەکانی دەوحە بۆ گەیشتن بە ڕێککەوتنی ئاگربەست بە باشی بەڕێوەدەچن و گەشبینن هاوکات دۆناڵد ترەمپ، سەرۆکی ئەمریکا گوتی، هەواڵی خۆشمان پێیە لەسەر غەززە و هەندێک شتی دیکە کە کاریان لەسەر دەکەین".

ئەمەش بزانە: ئەم لێدوانەی ویتکۆف لە کاتێکدایە، کە پێشتر ئیسرائیل پلانێکی نوێی پێشکەش بە نێوەندگیرەکان کردووە و بڕیارە دەست بە کشانەوەی بەرفراوان بکەن لە ناوچەی رەفەح  وەک هەوڵێک بۆ کەمکردنەوەی گرژییەکان و گەیشتن بە  ڕێککەوتنێک.