پەیامی سەرۆکوەزیران مەسرور بارزانی لەبارەی ڕێککەوتنی هەولێر و بەغدا

ئاڤا نیوز

 

سەرۆکوەزیران مەسرور بارزانی لەبارەی ڕێککەوتنی نێوان هەولێر و بەغدا دەڵێت، حکومەتی هەرێمی کوردستان، لە پێناو بەرژەوەندی و کەمکردنی فشار لە سەر خەڵکی کوردستان، هەموو نەرمییەکی  نواند و پابەندییەکانی خۆی بە تەواوی جێبەجێ کرد. داواش دەکات، "مووچە چیتر تێکەڵی هیچ کێشە و ناکۆکییەک نەکرێت". 

 

چیرۆکی سەرەکی: ڕۆژی چوارشەممە ئەنجوومەنی وەزیرانی هەرێمی کوردستان بەسەرپەرشتیی سەرۆکوەزیران مەسرور بارزانی ڕەشنووسی لێكتێگەیشتنەكەی نێوان هەولێر و بەغدای پەسەند كرد و بە نووسراوی فەرمی ئاراستەی بەغدا کرا. ئەمڕۆ پێنجشەممە ئەنجوومەنی وەزیرانی عێراق کۆبوونەوەیەکی نائاسایی کرد و لێكتێگەیشتنی نێوان هەولێر و بەغدای پەسەند كرد، دواتریش بڕیاری ناردنی یەک مووچەی دا.

 

پەیامی فەرمی: سەرۆکوەزیران مەسرور بارزانی ڕایگەیاند: دوای ئەوەی حکومەتی هەرێمی کوردستان لە پێناو بەرژەوەندی و کەمکردنی فشار  لە سەر خەڵکی کوردستان، هەموو نەرمییەکی  نواند و پابەندییەکانی خۆی بە تەواوی جێبەجێ کرد و دوای هەوڵ و گفتوگۆیەکی زۆر، ئەمڕۆ ئەنجوومەنی وەزیرانی فیدراڵیش، ڕەزامەندی لەسەر لەیەکتێگەیشتنی هاوبەشی نێوان هەردوو حکومەتی هەرێمی کوردستان و فیدراڵ دا.

 

سەرۆکوەزیران مەسرور بارزانی پێشوازیی لەو هەنگاوە دەکات و دەڵێت، "چاوەڕوانین حکومەتی فیدراڵ، مووچە و شایستە داراییەکانی هەرێمی کوردستان بنێرێت.

 

لە بەشێکی دیکەی پەیامەکەیدا، سەرۆکوەزیران سوپای خەڵکی کوردستان دەکات و دەڵێت، "پێزانینێکی زۆرم بۆ خۆڕاگری و پشوودرێژیی خەڵکی کوردستان هەیە، هەروەها سوپاسی ماندووبوونی هەموو کەس و لایەنێکیش دەکەم کە هەوڵیان بۆ چارەسەرکردنی کێشەی مووچە داوە و بەردەوام هاوکار و پاڵپشتمان بوون. 

 

سەرۆکوەزیران داوا دەکات ، هیوادارم مووچە و شایستە داراییەکان، کە مافێکی ڕەوای خەڵکی کوردستانە ، چیتر تێکەڵی هیچ کێشە و ناکۆکییەک نەکرێت و لە چوارچێوەی دەستوور و بە ڕێزگرتن لە ڕێککەوتنەکان، کێشەکانمان چارەسەر بکەین.

 

ئەوەی پێویستە بیزانیت: هەرچی پەیوەستە بەو هێرشە درۆنیانەی دەکرێنە سەر کێڵگە نەوتییەکانی کوردستان، سەرۆکوەزیران مەسرور بارزانی داوا دەکات،  "کۆتایی بەو هێرشانە بێت کە دەکرێنە سەر هەرێمی کوردستان و بە تایبەتیش کێڵگە نەوتییەکان. هیوادارین حکومەتی فیدراڵ، هاوکار بێت لە دۆزینەوری ئەو تێکدەرانە و گرتنەبەری ڕێکاری یاسایی لە دژیان.