بەهۆی ڕووداوێکی هاتوچۆوە چوار کەس لە ڕێگەی زەڕایەن - دەربەندیخان گیانیان لەدەستدا

ئاڤا نیوز

لەسەر ڕێگەی نێوان زەڕایەن و دەربەندیخان، لە نزیک گوندی سێدارە، ڕووداوێکی دڵتەزێنی هاتووچۆ ڕوویدا کە بووە هۆی گیانلەدەستدانی چوار هاووڵاتی.

چیرۆکی سەرەکی: ڕووداوەکە لە ئەنجامی پێکدادانی نێوان ئۆتۆمبێلێکی تایبەت و تانکەرێکدا بووە. سەرجەم سەرنشینانی ئۆتۆمبێلە تایبەتەکە کە پێکهاتبوون لە دوو ئافرەت، منداڵێک و پیاوێک، دەستبەجێ گیانیان لەدەستدا.

زانیاریی تایبەت: سەرچاوەیەک لە نەخۆشخانەی شەهید ڕەئوف لەقەزای شارەزوور بەئاڤا میدیای ڕاگەیاند، قوربانییەکان بریتین لە منداڵێکی تەمەن 10 ساڵان، دوو ئافرەت کە تەمەنیان لە نێوان 35 بۆ 40 ساڵیدایە، هەروەها لەگەڵ پیاوێکی تەمەن 40 ساڵ.

تەرمی قوربانییەکان گواستراونەتەوە بۆ نەخۆشخانەی گشتی شەهید ڕەئوف بەگ لە قەزای شارەزوور و بڕیارە دواتر ڕەوانەی پزیشکی دادی سلێمانی بکرێن بۆ لێکۆڵینەوەی زیاتر.