پرۆژەی دووسایدی ڕانیە - سەركەپكان دەستیپێكرد

ئاڤا نیوز

پرۆژەی دووسایدی ڕانیە - سەركەپكان دەستیپێكرد كە ئاسانكاریی زیاتر بۆ هاتووچۆی نێوان هەردوو ئیدارەی ڕاپەڕین و سۆران دەكات، گوژمەی چوار ملیار دینار بۆ جێبەجێكردنی پرۆژەكە تەرخانكراوە.

چیرۆكی سەرەكی: لە درێژەی جێبەجێكردنی پرۆژە خزمەتگوزارییەکانی کابینەی نۆیەمی حكومەتی هەرێمی كوردستان بۆ ئاوەدانکردنەوەی ناوچە جیا جیاكانی کوردستان، پرۆژەی ڕێگای دووسایدی لەنێوان ڕانیە و سەركەپكان جێبەجێ دەكرێت كە درێژییەكەی نزیكەی سێ كیلۆمەترە.

ڕاگەیێنراوی فەرمی: ماڵپەڕی فەرمیی حكومەتی هەرێمی كوردستان بڵاویكردووەتەوە، پرۆژەكە بڕی چوار ملیار دیناری تێدەچێت كە جگە لە دروستكردنی دووسایدێک بە مەودای دوو هەزار و 800 مەتر، دروستكردنی ئاوەڕۆی سندووقی بە درێژایی 1700 مەتر لەخۆ دەگرێت.

زانیاریی زیاتر: بەشێکی دیکەی پرۆژەکە؛ دانانی 120 ستوونی ڕووناکییە،  هاوكات دوورگەی ناوەندی شەقامەكە سەوز دەكرێت و سیستمی ئاودێریی بۆ دادەنرێت.

بۆچی گرنگە: ڕێگاکە ئاسانکاریی زیاتر بۆ هاتووچۆی هاووڵاتییان و گەشتیارانی گوند و شارۆچکەکانی هەردوو ئیدارەی سەربەخۆی ڕاپەڕین و سۆران دەکات.