کۆمیسیۆن: زیاتر لە 700 هەزار کەس بۆ کارمەندی سەر سندووقەکان داواكاریان پێشکەشکردووە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ئاشکرایکرد، زیاتر لە 771 هەزار هاووڵاتی داواکارییان بۆ کارکردن وەک فەرمانبەری بنکەکانی دەنگدان بۆ هەڵبژاردنی پەرلەمانی داهاتوو پێشکەش کردووە.

وێنە گەورەکە: بڕیارە 2025-11-11، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، کۆمیسیۆنیش لە ئامادەکارییەکانی بۆ بەڕێوەبردنی هەڵبژاردنەکان بەردەوامە.

ڕاگەیێنراوی فەرمی:  کۆمیسیۆنی باڵای سەربەخۆی هەڵبژاردنەکانی عێراق ، ئەمڕۆ هەینی 2025-07-18، ئاماری ئەو کەسانەی بڵاوکردەوە کە ئارەزووی کارکردنیان وەک کارمەندی سەر سندووقەکانی دەنگدا هەیە و بە شێوەی ئەلیکترۆنی لە ڕێگەی لینکێکی تایبەت لە پەیجی تایبەتی کۆمسیۆن داواکارییان پێشکەش کردووە.

ژماره‌كان واده‌ڵێن: کۆمیسیۆن ئاماری پێشکەشکارانی بەپێی پارێزگاکان بڵاوکردووەتەوە کە تێیدا ئاماری پارێزگاکانی هەرێمی کوردستان و کەرکووک و نەینەوا تاوەکو ئێستا بەم شێوەیەیە:

هەولێر: 40.760 پێشکەشکار

سلێمانی: 41.224 پێشکەشکار

دهۆک: 30.683 پێشکەشکار

کەرکووک: 44.224 پێشکەشکار

نەینەوا: 76.713 پێشکەشکار

مەرج و ڕێنماییەکان: بەگوێرەی کۆمیسیۆنی باڵای سەربەخۆی هەڵبژاردنەکان، تەنیا ئەم چین و توێژانە دەتوانن داواکاری پێشکەش بکەن:

٠ فەرمانبەرانی هەموو فەرمانگەکانی دەوڵەت، جگە لە هێزە ئەمنی و سەربازییەکان.

٠ قوتابیانی زانکۆ و پەیمانگاکان و دەرچووان، بە مەرجێک کەمترین ئاستی خوێندنی دەرچووان دیبلۆم بێت.

شێوازی جێبەجێکردن: پێشکەشکردن بە شێوەی ئەلیکترۆنی دەبێت لە ڕێگەی ئەو لینکە، پاشان فۆڕمی پێشکەشکردن ڕادەکێشرێت و سەردانی ناوەندەکانی تۆمارکردنی ناو پارێزگا دەکرێت، لەگەڵ پێویستی هێنانی بەڵگەنامە داواکراوەکان.

داتای ئەو کەسانەی کە وەکو کارمەندی سەر سندووقەکانی دەنگدان داواکارییان پێشکەش کردووە