دوای ئاگرکەوتنەوەکەی کوت 10 هۆتێل و دامەزراوەی گەشتیاری لە مووسڵ دادەخرێن

ئاڤا نیوز

ڕۆژی هەینی، لیژنەکانی پشکنین 10 هۆتێل و دامەزراوەی گەشتیارییان لە مووسڵ داخست بەهۆی سەرپێچیکردنی مەرجەکانی سەلامەتی و ئەمنی.

چیرۆکی سەرەکی: شەوی 2025-07-16، لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێک کەوتەوە، بەهۆی نەبوونی مەرجی تەندروستیی و سەلامەتی، 61 کەس گیانیان لەدەستدا و 38 کەسی دیکەش برینداربوون.

لێدوانی فەرمی: ئەحمەد فەکاک بەدرانی، وەزیری ڕۆشنبیری و گەشتوگوزار و شوێنەوارەکان بە میدیاکانی عێراقی ڕاگەیاند: لیژنەکانی پشکنین ڕاسپێردراون بۆ بەدواداچوون بۆ ڕێکارەکانی داخستنی سەرپێچیکاران، هەروەها وەزارەت لە ماوەی داهاتوودا بەردەوام دەبێت لە پشکنین و دڵنیابوون لە پابەندبوون بە پێوەرەکانی سەلامەتی لە شوێنە گشتیی و گەشتیارییەکان لە سەرجەم پارێزگاکانی عێراق.

لەلایەکی دیکەوە: ئەنجوومەنی پارێزگای واست بڕیاریدا قوربانییانی کارەساتی شاری کوت وەک "شەهید" لەقەڵەم بدات و هەریەکە لە بەڕێوەبەری شارەوانیی کوت و بەڕێوەبەری سەلامەتیی پیشەیی لە کارەکانیان ڕابگرێن، ئەنجوومەنی وەزیرانیش قەرەبووی کەس و کاری قوربانییان دەکاتەوە.