لە دەوروبەری شاری سوەیدا شەڕ لەنێوان خێلە بەدەوییەکان و چەکدارانی دروز ڕوودەدات

ئاڤا نیوز

ئەمڕۆ هەینی، شەڕ و پێکدادان لە نێوان خێلە بەدەوەییەکان و گرووپە چەکدارەکانی پێکهاتەی دروز لە دەوروبەری پارێزگای سوەیدا ڕووی دا.

ڕاگەیێنراوی فەرمی: ڕوانگەی سووری بۆ مافەکانی مرۆڤ ئاشکرای کرد، سێ کاروانی چەکدارانی خێلەکانی عەرەبی لە پارێزگاکانی دێرەزور و حومس کە لە سەدان چەکدار پێکدێن بەرەو سوەیدا بەڕێکەوتوون بۆ پاڵپشتیکردنی خێلە بەدەوییە عەرەبییەکانی سوەیدا، مەترسی هەیە شەڕ و پێکدادانەکە تووندتر بێت.

زانیاریی زیاتر: لە ڕۆژی یەکشەممە ڕابردوو، شەڕ و پێکدادان لەنێوان خێڵە بەدەوییەکان و چەکدارانی دروز ڕووی دا، دوای سێ ڕۆژ سوپای سووریا بۆ کۆتاییهێنان بە شەڕەکە چووە نێو شارەکە، بەڵام ئیسرائیل بە پاساوی پاراستنی دروزەکان بۆردوومانی هێزەکانی سوپای کرد و ناچاری کردن شارەکە جێبێڵن.

ئەوەی پێویستە بیزانیت: بە وتەی بەدەوییەکان چەکدارەکانی حیکمەت هیجری کە یەکێکە لە پیاوانی دیاری دروزەکان و لەلایەن ئیسرائیلەوە پشتیوانی دەکرێن، دەستیان کردووە بە کوشتاری خێڵەکەیان و تەنانەت ژن و منداڵی خێڵەکەشیان کوشتوون.

ژمارەکان وا دەڵێن: ئاژانسی "فرانس پرێس" لەسەر زاری سەرچاوە پزیشکییەکان ئاشکرای کرد، لە ڕۆژی دووشەممەی ڕابردووەوە زیاتر لە 400 تەرم گەیێندراوەتە نەخۆشخانەی سوەیدا.