دوو کەس لە سنووری پێنجوێن بە درۆن کرانە ئامانج

ئاڤا نیوز

 

بەهۆی بۆردومانی ماتۆڕسکیلێک بە درۆن لە سنووری قەزای پێنجوێن کەسێک کوژرا و کەسێکیش بریندار بوو. بەگوێرەی زانیارییە نافەرمییەکان سەر بە پەکەکە بوون.

 

وێنە گەورەکە: بەرەبەیانیی ئەمڕۆ شەممە لە گوندى شێوەگوێزانى نزیک مەرزى سەیرانبەن لە سنووری قەزای پێنجوێن، درۆنێک، ماتۆڕسکیلێک بە ئامانج دەگیرێت کە دوو کەسى لەسەر بووە.

 

لێدوانی فەرمی: حاکم زیاد عەبدوڵڵا، بەڕێوەبەرى ناحیەى گەرمک بە ئاڤا میدیای ڕاگەیاند،  "درۆنێک لە سنوورى گەرمک، ماتۆڕسکیلێکى بە ئامانج گرتووە و کەسێک کوژراوە و کەسێکى دیکەش بە سەختی بریندارە، بۆردومانەکە لە گوندى شێوەگوێزانى نزیک مەرزى سەیرانبەن بووە و ماتۆڕسکیلێک بە ئامانج گیراوە کە دوو کەسى لەسەر بووە.

 

بەڕێوەبەرى ناحیەى گەرمک دەڵێت، نازانن ئەو کەسانەى بە ئامانجگیراون سەر بە چ لایەنێکن و کێش ئەوانی بە ئامانج گرتووە، دوای ڕووداوەکە هێزە ئەمنییەکان گەیشتوونەتە شوێنی ڕووداوەکە و لێکۆڵینەوەیان دەستپێکردووە.

 

زانیاریی پەیامنێر: ژیوار عەبدولڕەحمان، پەیامنێری ئاڤا ڕایگەیاند، بەگوێرەی زانیارییە نافەرمییەکان ئەو کەسانەی کراونەتە ئامانج سەر بە پارتی کرێکارانی کوردستان (پەکەکە) بوون.