عەلی باپیر: کەسانێک لەپەنای کۆمەڵ بوونە خاوەنی ئیمتیازی ماددی و مەعنەوی و بێ ئەمەک بوون

ئاڤا نیوز

 

عەلی باپیر، سەرۆکی کۆمەڵی دادگەریی کوردستان ڕایگەیاند، کەسانێک لەپەنای کۆمەڵ بوونە خاوەنی ئیمتیازی ماددی و مەعنەوی، کەچی بێ ئەمەک بوون بەرامبەر حیزبەکە و دەنگدەرانیان.

 

چیرۆکی سەرەکی: ئەمڕۆ لە هۆڵی سەعد عەبدوڵڵا لە شاری هەولێر، کۆمەڵی دادگەریی کوردستان، بە بەشداری 900 ئەندامی پێنجەمین کۆنگرەی خۆی دەستپێکرد و دوو ڕۆژ دەخایێنێت.

 

لێدوانی فەرمی: عەلی باپیر، سەرۆکی کۆمەڵی دادگەریی کوردستان لە کۆنگرەی پێنجەمی حیزبەکەی وتارێکی پێشکەشکرد و ڕایگەیاند، کەسانێک لەنێو کۆمەڵ پەیدابوون، هەڵپە و پەلە پەلیانە بۆ وەرگرتنی پلە و پۆستە حکومییەکان و بوون بە پەرلەمانتار؛ لە پەنای کۆمەڵدا ئیمتیازی ماددی و مەعنەوییان وەرگرت، پاشان بێ ئەمەک بوون بەرامبەر حیزبەکەیان، ئەوەش وەک خاڵی بێهێز سەیر دەکرێت.

ڕوونیشی کردەوە هەندێکیان تەنانەت ڕیزەکانی کۆمەڵی دادگەریشیان جێهێشتووە بۆ ئەوەی لە پابەندی دارایی حیزبەکەیان خۆدەرباز بکەن، لەکاتێکدا ئەوان بە دەنگی لایەنگرانی کۆمەڵی دادگەری بوونەتە پەرلەمانتار و خاوەنی ئیمتیاز.

 

ئەوەی پێویستە بیزانیت: ئەو وتانەی سەرۆکی کۆمەڵی دادگەری لەکاتێکدایە؛ سۆران عومەر، سەرۆکی فراکسیۆنی حیزبەکە لە پەرلەمانی عێراق و تاکە پەرلەمانتار کۆمەڵ لە بەغدا بەشداری پێنجەمین کۆنگرەی حیزبەکەی نەکردووە، لە کاتێکدا بەپێی پەیڕەوی ناوخۆی ئەو حیزبە دەبووایە بەشداری بکات.