15 قوتابی وڵاتانی عەرەبی مەشقی هاوینە لە هەرێمی کوردستان دەکەن

ئاڤا نیوز

15 قوتابی زانکۆکانی وڵاتانی عەرەبی مەشقی هاوینەیان لە هەرێمی کوردستان دەکەن. هەروەها بەشداریی ژمارەیەک دیدار و چالاکی دەربارەی مێژوو و کولتووری هەرێمی کوردستان دەکەن.

وێنە گەورەکە: لە چوارچێوەی ئالوگۆڕی زانستی و کولتووی نێوان زانکۆی سەڵاحەددین و زانکۆکانی عەرەبی و جیهانی، دووەم ساڵە قوتابیانی زانکۆ عەرەبییەکان مەشقی هاوینەیان لە هەرێمی کوردستان دەکەن، قوتابیانی هەرێمی کوردستانیش ڕەوانەی وڵاتانی عەرەبی دەکرێن.

لێدوانی فەرمی: دکتۆر کامەران دزەیی، سەرۆکی زانکۆی سەڵاحەددین بە ئاڤامیدیای گوت: لەمیانی پرۆگرامی ئەنجوومەنی عەرەبی بۆ مەشق و گەشەپێدانی قوتابیان بۆ دووەم ساڵە زانکۆی سەڵاحەددین میوانداریی قوتابیانی زانکۆکانی عەرەبی دەکات بۆ مەشقی هاوینە لە هەرێمی کوردستان، "قوتابیانیشمان ڕەوانەی وڵاتانی عەرەبی دەکەین"، ئەمەش لە چوارچێوەی پلانێکە بۆ ئالوگۆڕی زانستی و کولتووری.

زانیاریی زیاتر: ئەمساڵ 15 قوتابی لە وڵاتانی میسر و یەمەن و فەڵەستین کە قوتابین لە بوارەکانی شوێنەوار و پرۆگرامسازی و کارگێڕی کار، هاتوونەتە هەولێر و مەشقی هاوینەیان لە هەرێمی کوردستان دەکەن.

ئەوەی پێویستە بیزانیت: ئەو قوتابیانە جیا لە مەشقی هاوینەیان، بەشداری ژمارەیەک دیدار و چالاکی دەربارەی مێژوو و کولتووری هەرێمی کوردستان دەکەن و سەردانی ژمارەیەک شوێنەوار و شوێنی گەشتیاریش دەکەن.

گۆشەیەکی دیکەی دیمەنەکە: 13 قوتابی زانکۆی سەڵاحەدین و زانکۆی پۆلی تەکنیکی هەولێر، بۆ مەشقی هاوینە ڕەوانەی وڵاتی میسر کراون، ژمارەیەکیش ڕەوانەی سەڵتەنەی عومان کراون.