پڕۆژەکانی کابینەی نۆیەم گرفتی کەمئاوی بۆ چەندین ساڵی داهاتوو چارەسەر دەکات

ئاڤا نیوز

بەهێزکردنی ژێرخانی ئاو هەرێمی کوردستان بردووەتە قۆناغێکی نوێوە و کاریگەرییەکانی وشکەساڵی بۆ دەیان ساڵی دیکە دوورخستووەتەوە.

چیرۆکی سەرەکی: بۆ پتەوکردنی ژێرخانی ئاو و مسۆگەرکردنی ئاسایشی ئاو لە هەرێمی کوردستان، دەیان پۆند، بەنداو و پرۆژەی ئاو و ئاوەڕۆ لە ناوچە جیاوازەکانی کوردستان دروست کراون، کە بۆ دابینکردنی ئاوی پاک و ڕووبەڕووبوونەوەی وشکەساڵی و زیادکردنی بەرهەمی کشتوکاڵی و پشتیوانیکردنی ئاژەڵداران کەڵکی لێ وەرگیراوە.

 

زانیاریی زیاتر: بەگوێرەی بەدواداچوونەکانی ئاڤا، لە ماوەی کابینەی نۆیەمدا 23 پۆند دروستکراون و 58 پۆندی دیکە لەژێر جێبەجێکردندان و بەشێکی دیکەشیان دروستدەکرێن، هەوەها 9 بەنداو بە گوژمەی 265 ملیار دینار دروستکراون و چەند بەنداوێکی دیکەش لە جێبەجێکردندان، نزیکەی یەک ترلیۆن دیناریش بۆ 9 پرۆژەی ئاو و ئاوەڕۆ لە سنووری شار و شارۆچکەکانی خەرج دەکرێت و دەیان هەزار هاونیشتمانی لە کەمئاوی ڕزگاریان دەبێت.

لێدوانی فەرمی: د. کاروان سەباح هەورامی، بەڕێوەبەری گشتیی سەرچاوەکانی ئاوی هەرێمی کوردستان بە ئاڤای ڕاگەیاند: لە کابینەی نۆیەمدا کار لەسەر ڕێکخستنەوەی دامودەزگاکانی تایبەت بە بواری ئاو کراوە، بایەخ بە کۆکردنەوەی ئاو دراوە و ئێستا توانای گلدانەوەی ئاو 10 ملیار و 100 ملیۆن مەتر سێجای تێپەڕاندووە، بە تەواوکردنی بەنداوی دووین توانای گڵدانەوەی ئاو لە کوردستان دەگاتە 10 ملیار و 200 ملیۆن مەتر سێجا.

ئەمەش بزانە: پۆند و بەنداوەکان توانای گڵدانەوەی ئاویان لە هەرێمی کوردستان بەرزکردووەتەوە، ئەمەش کاریگەریی ئەرێنی لەسەر ژێرخانی ئاو لە کوردستان دروست دەکات، جگە لەمەش پرۆژەکانی ئاو توانیویانە سەنتەری شار و شارۆچکەکان لە کەمئاوی ڕزگار بکەن و ناوچەکان لە وشکەساڵی دووربخەنەوە.