لە سێ پارێزگای عێراق 40 کەس بەتۆمەتی کارکردن بۆ بەعس دەستگیردەکرێن

ئاڤا نیوز

دەزگای ئاسایشی نیشتیمانی عێراق دەڵێت، لە سێ پارێزگای وڵاتەکە 40 کەسیان بەتۆمەتی کارکردن بۆ حیزبی بەعسی ڕووخاو و تێکدانی ئارامی وڵات دەستگیرکردووە، ئاشکراشی دەکات کە ئەو کەسانە فەرمانیان لە چەند کەسێکی هەڵاتووی دەرەوە وڵاتەوە وەرگرتووە.

چیرۆکی سەرەکی: بەگوێرەی یاسا بەرکارەکانی عێراق ئەندامییەتی لە حیزبی بەعس، کارکردن یان بانگەشەکردن بۆ بیروباوەڕیان یان پێهەڵدان بە سەرکردەکانیان، تاوانە و سزای بۆ دانراوە کە دەگاتە زیندانیکردن بۆ ماوەیەک کە لە 10 ساڵ زیاتر نەبێت.

ڕاگەیێنراوی فەرمی: دەزگای ئاسایشی نیشتیمانی عێراق لە ڕاگەیێنراوێکدا باسی لەوەشكردووە، لە پارێزگاکانی بەغدا، نەینەوا و سەڵاحەددین پیلانی چەند پاشماوەیەکی ڕژێمی لەناوچووی پێشوویان تێکشکاندووە، کە هەوڵیان داوە کاریگەریی لەسەر ڕایگشتی دروستبکەن و ئاسایشی وڵات تێکبدەن.

ئەوەی لەبارەیەوە دەگووترێت: ئەو گرووپە لە تۆڕە کۆمەڵایەتییەکان بانگەشەیان بۆ حیزبی بەعس کردووە و ناویان لە خۆیان ناوە لیوای 66 کە لەدەرەوە و لەڕێگەی تۆڕە کۆمەڵایەتییەکانەوە کاریانکردووە، لەناوخۆشدا 40 کەسیان لێ دەستگیرکراوە کە بەشداربوون لە بەڕێوەبردن وپارەدارکردنی ئەو پێگە ئەلیکترۆنییانە، دوای لێکۆڵینەوەش لەگەڵیاندا دانیان بەوەداناوە کە لەلایەن چەند کەسێکەوە لە دەرەوەی وڵات ئاڕاستەکراون.