بۆ بەرەنگاربوونەوەی مەترسیی ماددەی هۆشبەر هانا بۆ مزگەوتەكان دەبرێت

ئاری عەبدوڵڵا

بەڕێوەبەرایەتیی نەهێشتنی ماددە هۆشبەرەكان لەڕێگەی مینبەری مزگەوتەكانەوە، هاووڵاتییان لە مەترسی بەكارهێنانی ماددە هۆشبەر و كارتێكەرە عەقڵییەكان هۆشیار دەكاتەوە.

چیرۆكی سەرەكی: بەڕێوەبەرایەتیی نەهێشتنی ماددە هۆشبەرەكان سەر بە ئەنجوومەنی ئاسایشی هەرێمی کوردستان، بە هەماهەنگی لەگەڵ وەزارەتی ئەوقاف و كاروباری ئایینی، هەڵمەتێكی هۆشیاركردنەوەی هاووڵاتییان لە مەترسی ماددە هۆشبەرەكان دەستپێكردووە.

چی ڕوودەدات: تیمەكانی هۆشیاركردنەوە لە بەڕێوەبەرایەتیی نەهێشتنی ماددە هۆشبەرەكان لە مزگەوتەكان لە كاتی وتاری هەینی و دوای نوێژی عەسران، كورتە وتار و كۆڕ و سیمینار لەنێو حەرەمی مزگەوتەكان ڕێكدەخەن، تێیدا ئامادەبووان لە مەترسییەكانی ماددەی هۆشبەر بۆ سەر تاك و خێزان و كۆمەڵگە ئاگادار دەكەنەوە، هاوكات لایەنی یاسایی و دەروونی و لێكەوتەكان شی دەكەنەوە كە زۆرینەی خەڵك وەك پێویست پێی ئاشنا نین و هەڵمەتەكەش بۆ ماوەیەك بەردەوام دەبێت.

زانیاریی بەدەستهاتوو: بەپێی ئەو زانیارییانەی ئاڤا لەنێو بەڕێوەبەرایەتیی نەهێشتنی ماددە هۆشبەرەكان دەستی كەوتووە، تا ئێستا هەڵمەتەكە لە 15 مزگەوت ئەنجام دراوە و پرۆسەكەش لە تەواوی هەرێمی كوردستان بەردەوامی دەبێت لەڕێگەی هەماهەنگیكردن لەگەڵ بەڕێوەبەرایەتیی ئەوقافی پارێزگا و ئیدارە سەربەخۆكان و ئیدارەی مزگەوتەكان و مامۆستایانی ئایینی.

هۆكارە زانراوەكان: بەكارهێنان و بازرگانیكردن بە ماددەی هۆشبەر لە عێراق و هەرێمی كوردستان لە هەڵكشانێكی ترسناكدایە و ڕۆژ لەدوای ڕۆژ ژمارەی ئاڵوودەبووان بە ماددە هۆشبەر و كارتێكەرە عەقڵییەكان زیاتر دەبێت، بەپێی بەدواداچوونەكانی دەزگای داواكاریی گشتی، لەنێو سەرجەم دۆسیەكانی تاوان كە لە دادگاكان تۆماركراون، بەكارهێنان و ئاڵوودەبوون بە ماددەی هۆشبەر، زۆرترین ڕێژەی تاوان پێكدەهێنن.