ئێران: ئاسمانمان پارێزراوە

ئاڤا نیوز

جێگری فەرماندەی ئۆپەراسیۆنەکانی سوپای ئێران دەڵێت، وڵاتەکەی ئەو سیستمە بەرگرییە ئاسمانییانەی نۆژەنکردووەتەوە کە لە جەنگەکەیان لەگەڵ ئیسرائیل زیانیان پێگەیشتبوو.

وێنە گەورەکە: لە ماوەی شەڕی 12 ڕۆژەدا، هێزی ئاسمانی ئیسرائیل توانیبووی کۆنترۆڵی ئاسمانی ئێران بکات و گورزێکی بەرچاو لە بەرگری ئاسمانی ئەو وڵاتە بوەشێنێت.

لێدوانی فەرمی: مەحمود موسەوی، جێگری فەرماندەی ئۆپەراسیۆنەکانی سوپای ئێران ڕایگەیاند، هەندێک لە سیستمەکانی بەرگری ئاسمانی وڵات زیانیان پێگەیشتووە و وتی: ئەمە شتێک نییە بتوانین بیشارینەوە، بەڵام هاوکارەکانمان بە کەڵک وەرگرتن لە توانای ناوخۆیی، سیستمی پێشوەختە ئامادەکراو، شوێنی ئەو سیستمانەی گرتووەتەوە بۆ ئەوەی ئاسمانی ئێران پارێزراو بێت.

لەلایەکی دیکەوە: سەرچاوە سەربازییەکانی ئیسرائیل ئاماژەیان بەوە کردووە نزیکەی 120 سیستەمی بەرگری ئاسمانی ئێران، کە دەکاتە یەک لەسەر سێی کۆی سیستمەکانی پێش جەنگ، لەکارخراون یان تێکشکێندراون. لەنێو ئەو سیستەمانەدا، سیستمی پێشکەوتووی (S-300)ـی ڕووسی و سیستمی بەرگری ئێرانیش هەبوون.

زانیاریی زیاتر: شارەزایانی بواری سەربازی هۆکاری ئەم زیانانە بۆ ئەوە دەگەڕێننەوە کە سیستمەکانی بەرگری ئێران، تێکەڵەیەک بوون لە سیستمی ڕووسی، چینی و خۆماڵی، بە شێوەیەکی کاریگەر پێکەوە نەبەسترابوونەوە و ڕادارەکانیان کێشەی جیاکردنەوەی مووشەکەکانی دوژمنیان هەبووە.