ناسنامەی 15 تەرمی کارەساتەکەی کوت لە ڕێگەی DNAـەوە دەستنیشانکرا

ئاڤا نیوز

فەرمانگەی پزیشکی دادوەری عێراق ڕایدەگەیێنێت، تا ئێستا ناسنامەی 15 کەس لە قوربانییانی ئاگرکەوتنەوەکەی شاری کوت لە ڕێگەی پشکنینی DNAـەوە دەستنیشان کراوە.

چیرۆکی سەرەکی: شەوی 2025-07-16، لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێک کەوتەوە، بەهۆی نەبوونی مەرجی تەندروستیی و سەلامەتی، نزیکەی 70 کەس گیانیان لەدەست داو دەیان کەسی دیکەش برینداربوون.

لێدوانی فەرمی: زەید عەلی، بەڕێوەبەری گشتیی فەرمانگەی پزیشکی دادوەری عێراق، لە لێدوانێکدا بە ئاژانسی فەرمی عێراقی ڕاگەیاند، لە قۆناغی یەکەمدا، تەرمی 43 قوربانی لە ڕێگەی ناسینەوەی ڕووکەشییەوە ڕادەستی کەسوکاریان کراونەتەوە. بەڵام 17 تەرمی دیکە بەهۆی سووتانی سەختەوە نەدەناسرانەوە. بۆ ئەم مەبەستە، پشکنینی DNA بۆ 16 قوربانی و چەند پاشماوەیەکی جەستە کرا. تیمەکان بنکەیەکی زانیارییان لە وێنەی DNAـی کەسوکاری قوربانییەکان دروست کرد بۆ ئەوەی لەگەڵ نموونەی قوربانییەکاندا بەراوردی بکەن.

زانیاریی زیاتر: بەوتەی عەلی، لە ماوەی تەنیا 18 کاتژمێر، ئەنجامی 15ـیان دەرچوو و دوای ڕێکارە یاساییەکان لەگەڵ دادگای کوت، تەرمەکان ڕادەستی خێزانەکانیان کرانەوە. هەروەها ئاماژەی بەوەشدا کە چەند دۆخێکی ئاڵۆزتر، کە بریتین لە پاشماوەی جەستەی مرۆڤ، ماون و پێویستیان بە کاتی زیاترە. پێشبینی دەکرێت تا کۆتایی ئەم هەفتەیە ئەنجامی کۆتایی ئەوانیش دەربکەوێت و بە تەواوی دۆسیەی قوربانییەکان دابخرێت.