حکومەتی عێراق: سەرەڕای ئاستەنگەکان پابەندییە داراییەکانمان جێبەجێ دەکەین

ئاڤا نیوز

حکومەتی عێراق جەخت لەوە دەکاتەوە کە بەردەوام دەبێت لە جێبەجێکردنی پابەندییە داراییەکانی، وەک مووچە و پڕۆژە خزمەتگوزارییەکان، سەرەڕای بوونی چەندین ئاستەنگ.

لێدوانی فەرمی: دکتۆر مەزهەر محەممەد ساڵح، ڕاوێژکاری دارایی سەرۆکوەزیرانی عێراق ڕایگەیاند، حکومەت سەرکەوتوو بووە لە جێبەجێکردنی پابەندییە داراییەکانی سەرەڕای ئەو ئاستەنگانەی کە هاوکات بوون لەگەڵ جێبەجێکردنی هەندێک لە بڕگەکانی بودجەی گشتیی فیدراڵیی سێ ساڵە، بەتایبەتی ئەوەی پەیوەستە بە ماددەی 12ـی تایبەت بە هەرێمی کوردستان.

ئەوەی پێویستە بیزانیت: بەگوێرەی ماددە 12 هەرێمی کوردستان دەبێت 450 هەزار بەرمیل نەوتی ڕۆژانە ڕادەست بکات، لەگەڵ داهاتە نانەوتییەکان، بەرامبەر بەدەستهێنانی ڕێژەی 12.67% لە کۆی گشتیی بودجە دوای دەرکردنی خەرجییە سیادییەکان.

لە هەمان کاتدا: ساڵح ڕوونیکردەوە کە هەستان و دابەزینی نرخەکانی نەوتی جیهانی کاریگەریی هەبووە لەسەر جووڵەی بودجە، بەڵام دەوڵەت بەردەوام بووە لە جێبەجێکردنی بەڵێنەکانی، لە ڕێگەی چەسپاندنی گرێبەستەکان، فراوانکردنی تۆڕی پاراستنی کۆمەڵایەتی و بەردەوامبوون لە جێبەجێکردنی پڕۆژە خزمەتگوزارییەکان.

بە تەنیشت ئەو بابەتەوە: ئەو لێدوانەی ڕاوێژکارە داراییەکەی سەرۆکوەزیرانی عێراق لە کاتێکدایە دوێنێ یەکشەممە، لیژنەی دارایی پەرلەمانی عێراق میوانداریی تەیف سامی، وەزیری دارایی عێراقی کرد و بە هەمان شێوە سەرەڕای بوونی دەیان قەیران، لەنێویاندا کەمی پارەی نەختینە لە عێراق، یەکلایینەبوونەوەی ناکۆکییەکانی نێوان هەولێر و بەغدای لەگەڵ ناجێگریی بەهای نەوت بەهۆکار زانی لەوەی تائێستا حکومەت خشتەی بودجەی ئەمساڵی ڕەوانەی پەرلەمان نەکردووە.