بەشێک لە فراکسیۆنە کوردستانییەکان بایکۆتی دانیشتنی پەرلەمان دەکەن

ئاڤا نیوز

ئەمڕۆ دووشەممە، پەرلەمانی عێراق دانیشتنێکی نائاسایی کرد بۆ تاوتوێکردنی هێرشە درۆنییەکانی سەر کێڵگە و دامەزراوە نەوتییەکانی ئەم دواییەی هەرێمی کوردستان و ئاگرەکەی شاری کوت، بەشێک لە فراکسیۆنە کوردییەکانیش بایکۆتی دانیشتنەکەیان کرد.

چیرۆکی سەرەکی: دانیشتنی ئەمڕۆی پەرلەمانی عێراق  تەرخانکرابوو بۆ تاوتوێکردنی هێرشە تیرۆریستییەکان بە درۆنی بۆمبڕێژکراو بۆ سەر ژێرخانی وزەی هەرێمی کوردستان و دەرەنجامەکانی کارەساتی ئاگرکەوتنەوەکەی پارێزگای کوت بکات.

زانیاریی بەدەستهاتوو: دەروون مەلا ناجی، پەیامنێری ئاڤا میدیا لە بەغدا ئاشکرای کرد، جێگری سەرۆکی پەرلەمان و هەردوو فراکسیۆنی پارتی و یەکێتی بایکۆتی دانیشتنەکەیان کرد و دواتر دانیشتنەکە بەهۆی تەواو نەبوونی ڕێژەی یاسایی ژمارەی پەرلەمانتاران تەنها تەرخانکراوە بۆ گفتوگۆکردن.

زانیاریی زیاتر: بەگوێرەی زانیارییەکانی ئاڤا میدیا، تەنیا سۆران عومەر و دارا سێکانیانی و د. جەمال کۆچەر لە هەردوو فراکسیۆنی کۆمەڵی دادگەری و یەکگرتووتی ئیسلامی بەشداربوون.

ئەوەی پێویستە بیزانیت: لە چەند ڕۆژی ڕابردوودا کێڵگە نەوتییەکانی هەرێمی کوردستان بوونە ئامانجی درۆنە بۆمبڕێژکراوەکان، بەهۆی هێرشەکانیشەوە بەرهەمهێنان لە بەشێکی کێڵگەکان بەشێوەیەکی کاتی وەستا، ئەمەش کاریگەریی نەرێنی لەسەر ئاستی بەرهەمهێنانی ئەو کێڵگانە و ژێرخانی هەرێمی کوردستان دروست کرد.