مانگانە نزیکەی 600 نەشتەرگەری لە نەخۆشخانەیەکی هەولێر دەکرێن

ئاڤا نیوز

مانگانە نزیکەی 600 نەشتەرگەری لە نەخۆشخانەی فریاکەوتنی ڕۆژئاوای هەولێر دەکرێن و بەڕێوەبەری نەخۆشخانەکەش ڕایدەگەیێنێت: تەنیا دوێنێ 19 نەشتەرگەری ئێسک و شکانمان کردووە.

 

وێنە گەورەکە: نەخۆشخانەی فریاکەوتنی ڕۆژئاوای هەولێر، لە 24 کاتژمێردا بە بەردەوامی پێشوازی لە هەر ڕووداوێکی نەخوازراو و نەخۆشییەکی کتوپڕ دەکات، بەمەش ڕۆژانە دەیان هاونیشتمانی ڕوو لە نەخۆشخانەکە دەکەن و بەشێکیان پێویستتیان بە نەشتەرگەریی دەبێت. 

 

لێدوانی فەرمی: د. کاروان یاسین، بەڕێوەبەری نەخۆشخانەی فریاکەوتنی ڕۆژئاوای هەولێر بە ئاڤای ڕاگەیاند: هاووڵاتییان لەڕووداوە نەخوازراوەکاندا تووشی حاڵەتەکانی شکان دەبن، بۆیە ڕوو لە نەخۆشخانەکە دەکەن و چارەسەر دەکرێن، بەمەش مانگانە نزیکەی 600 نەشتەرگەریی ئێسک و شکان لە نەخۆشخانەکە دەکرێت.

 

گۆشەیەکی دیکەی دیمەنەکە: بە گوتەی د. کاروان یاسین، تەنیا دوێنێ یەکشەممە 20-7-2025، لە کاتژمێر 8:30 بەیانی تا یەکی نیوەڕۆ، 19 نەشتەرگەریی ئێسک و شکان لە چوار هۆڵی نەشتەرگەریی نەخۆشخانەکە کراون، لەو ژمارەیە هەشتیان منداڵ بوون.