25 وڵات لە بەیاننامەیەکی هاوبەشدا: دەبێت شەڕی غەززە دەستبەجێ کۆتایی پێبێت

ئاڤا نیوز

25 وڵات داوای دەستبەجێی کۆتاییهێنانی شەڕی غەززەیان کرد و ئەو شێوازەی ئیسرائیل بۆ گەیاندنی هاوکارییەکان پەیڕەوی دەکات بە مەترسیدار ناویان برد.

چیرۆکی سەرەکی: ئەمڕۆ دووشەممە، 21-7-2025 وەزیرانی دەرەوەی بریتانیا، فەرەنسا، ئیتاڵیا، ژاپۆن، ئوسترالیا، کەنەدا، دانیمارک و چەندین وڵاتی دیکە لە بەیاننامەیەکی هاوبەشدا پەیامێکی خێرایان ئاراستەی کۆمەڵگەی نێودەوڵەتی کرد و داوایان کرد دەبێت دەستبەجێ شەڕ لەغەززە کۆتایی پێبێت.

ڕاگەیێنراوی فەرمی: لە بەیاننامەکەدا وەزیرانی دەرەوەی ئەو 25 وڵاتە  ئامادەیی تەواوی وڵاتەکانیان بۆ گرتنەبەری ڕێکاری زیاتر بەمەبەستی پشتگیریکردن لە ئاگربەستێکی دەستبەجێ و دۆزینەوەی ڕێڕەوێکی سیاسی کە ببێتە هۆی بەرقەراربوونی ئاسایش و ئاشتی بۆ ئیسرائیل و فەڵەستین و تەواوی ناوچەکە دەربڕی.

لەبەشێکی دیکەی بەیاننامەکەدا ئاماژە بەوەشکراوە کە زیاتر لە 800 فەڵەستینی لەکاتی هەوڵدان بۆ وەرگرتنی هاوکاری کوژراون و زۆربەیان لە نزیک بنکەکانی دەزگای غەززە بۆ کاروباری مرۆیی لەلایەن ئیسرائیلەوە کراونەتە ئامانج.

ئەوەی پێویستە بیزانیت: لەبڕی نەتەوە یەکگرتووەکان، ئیسرائیل بە پشتیوانیی ئەمریکا ئەرکی دابەشکردنی هاوکارییەکانی لە غەززە بە " دەزگای غەززە بۆ کاروباری مرۆیی سپاردووە، ئەو دەزگایەش بۆ گەیاندنی هاوکارییەکان بۆ خەڵکی سڤیلی غەززە کۆمپانیای ئەمنی و لۆجستیی ئەمریکی بەکاردەهێنێت.

باکگراوند: پێشتر نەتەوە یەکگرتووەکان کارکردنی دەزگای غەززە بۆ کاروباری مرۆیی بە پێشێلکردنی ستانداردەکانی بێلایەنیی مرۆیی ناوبرد، بەڵام دەزگاکە ئەو تۆمەتەی ڕەتکردەوە.