پارێزگاری واست پەیامێک ئاراستەی سوودانی دەکات؛ ئامادەم بۆ هەر لێکۆڵینەوەیەک

ئاڤا نیوز

دوای ئەوەی سوودانی بڕیاریدا ڕەوانەی لیژنەی لێکۆڵینەوەی بکات بەهۆی ڕووداوەکەی کوت، پارێزگاری واست دەڵێت، "ئامادەم بۆ هەر لێکۆڵینەوەک کە لەسەر ڕووداوەکە پێکدەهێنرێت". سوپاسی سەرۆکوەزیرانیش دەکات کە پێداگرە لەسەر ئاشکراکردنی هۆکارەکانی ڕووداوەکە.

چیرۆکی سەرەکی: شەوی 16-7-2025، لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێکی هەشت نهۆمی کەوتەوە، بەهۆی نەبوونی مەرجی تەندروستیی و سەلامەتی، بەهۆیەوە زیاتر لە 60 کەس گیانیان لەدەست دا و دەیان کەسی دیکەش برینداربوون، لەسەر ئەم ڕووداوەش سوودانی بڕیاریدا پارێزگاری واست و ئەندامانی لیژنەی بەرگریی شارستانی لێکۆڵینەوەیان لەگەڵ بکرێت.

ڕاگەیێنراوی فەرمی: محەممەد جەمیل ئەلمەیاحی، پارێزگاری واست لە ڕاگەیێنراوێکدا باسی لەوەکردووە، پێشوازی لە ئەنجامی لیژنەی لێکۆڵینەوە لە ڕووداوەکەی کوت دەکات کە سەرۆکوەزیران واژۆی لەسەر کردووە، ئامادەیە لێکۆڵینەوەی لەگەڵ بکرێت لەلایەن هەر لیژنەیەک بێت و پێداگریشە کە کاری لیژنەکە دادپەروەر، شەفاف و  ڕاستەقینە بێت.

ئەوەشی خستووەتەڕوو، ڕێگە بە خۆی نادات خوێنی قوربانییانی ئەو ڕووداوە تێکەڵ بە ململانێ و ناکۆکی سیاسی بکات، سوپاسی سەرۆکوەزیران و وەزیری ناوخۆش دەکات کە زۆر پێداگربوون بۆ ئاشکراکردنی هۆکاری ڕووداوەکە و لێپرسینەوە لەوانەی کەمتەرخەم بوون.