تورکیا دەست بە دانوستانێکی نوێ لەبارەی نەوت لەگەڵ عێراق دەکات

ئاڤا نیوز

تورکیا بە فەرمیی کۆتاییهاتنی ڕێککەوتنی هێڵی بۆریی نەوتی ساڵی 1973ـی لەگەڵ عێراق ڕاگەیاند و دەستی بە دانوستان کردووە بۆ گەیشتن بە ڕێککەوتنێکی نوێ و گشتگیرتر لە بواری وزەدا.

چیرۆکی سەرەکی: بەپێی فەرمانێکی سەرۆکایەتیی تورکیا، هەموو ئەو ڕێککەوتن و پرۆتۆکۆلانەی پەیوەستن بە هێڵی بۆریی نەوتی عێراق - تورکیا، لە ڕێکەوتی 27ـی تەمموزی 2026ـەوە بە هەڵوەشاوە دادەنرێن. بەمەش کۆتایی بە چوارچێوەیەکی یاسایی دێت کە بۆ ماوەی دەیان ساڵ کاری پێکراوە.

بڵاوکراوەی فەرمی: بەگوێرەی ئاژانسی ئەنادۆڵی تورکی، تورکیا دەستی بە دانوستان کردووە لەگەڵ حکومەتی عێراق بۆ گەیشتن بە ڕێککەوتنێکی گشتگیرتر بۆ گواستنەوەی نەوتی عێراق. ڕێککەوتنە نوێیەکە ئامانجی دامەزراندنی میکانیزمێکی هاوکاریی گشتگیرە کە خاوەنی دیدگایەکی فراوانتر و تێڕوانینێکی هاوبەش بێت لە کەرتی وزەدا.

ئەوەی پێویستە بیزانیت: دانوستانەکان دەستیان پێکردووە سەبارەت بە ڕێککەوتنێکی گشتگیرتر بۆ گواستنەوەی نەوتی خاوی عێراق بۆ تورکیا و لەوێشەوە بۆ بازاڕەکانی جیهان. بەپێی ئاژانسەکە، پێشبینی دەکرێت ڕێککەوتنە نوێیەکە ڕێگە بدات بە هاوکارییەکی بەرجەستە و درێژخایەن لە بوارەکانی وەک هاوکاری لە پڕۆژەکانی نەوتی خاو و گازی سروشتی، گەشەپێدانی کێڵگەکانی هایدرۆکاربۆن، هاوبەشی لە وەبەرهێنانی پترۆکیمیاویات و پاڵاوتن و پڕۆژەکانی بەرهەمهێنان و گواستنەوەی کارەبا.

لەلایەکی دیکەوە: هەر بەگوێرەی ئاژانسەکە گفتوگۆ لەسەر ئەو ڕێکخستنانە دەکرێت کە پەیوەستن بە توانای لەخۆگرتنی تەرخانکراو بۆ عێراق لە ماوەی داهاتوودا لە سیستمی هێڵی بۆرییەکەدا کە لە دوو هێڵ پێکدێت و کۆی تواناکەیان دەگاتە 1.5 ملیۆن بەرمیل لە ڕۆژێکدا، ئەمە جگە لە وێستگەی بۆتاش لە بەندەری جەیهانی تورکیا.