بەدواداچوونێکی ئاڤا کێشەی فەرمانبەرانی خانەنشینی بانکەکان چارەسەر دەکات

ئاڤا نیوز

دوای ئەوەی ئاڤا دەنگی بە وەزارەتی دارایی و ئابووریی حکومەتی هەرێمی کوردستان گەیاندن، کێشەی فەرمانبەرانی خانەنشینی بانکەکان لە سلێمانی چارەسەر کرا.

وێنە گەورەکە: 40 فەرمانبەری بانکەکانی سلێمانی کە لە ڕۆژی 21-12-2024، بەگوێرەی یاسای نوێی خانەنشینی خانەنشین کران، نە مووچە و نەپاداشتی شەش مانگی خانەنشینییان بۆ خەرج نەکرابوو، پێش هەفتەیەک گردبوونەوەیان کرد و لەڕێگەی ئاڤاوە داوایان کرد دەنگیان بە لایەنی پەیوەندیدار بگەیێنرێت و کێشەکەیان چارەسەر بکرێت.

زانیاریی پەیامنێر: چەند فەرمانبەرێکی خانەنشینکراوی بانکەکانی سلێمانی، پەیوەندییان بە ژیوار عەبدولڕەحمان، پەیامنێری ئاڤا کردووە و ڕایانگەیاندووە، لەلایەن بانکەکانەوە ئاگادارکراونەتەوە کە وەزیری دارایی و ئابووری فەرمانی بە خەرجکردنی ئیکرامییەکەیان کردووە، بۆ ئەوەی سبەی چوارشەممە سەردانیان بکەن، تا پارەی ئیکرامییەی شەش مانگەکەیان وەربگرن.

لەلایەکی دیکەوە: ئەو فەرمانبەرە خانەنشینکراوانەی بانکەکانی سلێمانی سوپاسی ئاڤایان کرد کە توانی دەنگیان بە وەزارەتی دارایی و ئابووری بگەیەنێت و کێشەکەیان دوای هەشت مانگ بۆ چارەسەر بکرێ.