ئاری هەرسین: لە ئۆکسجین زەرورتر نێوانی پارتی و یەکێتییە

ئاڤا نیوز

 

بەرپرسی لقی چواری پارتی دیموکراتی کوردستان باسی پەیوەندییەکانی ئێستای حیزبەکەی لەگەڵ یەکێتی دەکات و دەڵێت، "نێوانی پارتی و یەکێتی زۆر باشە و پێکەوە ڕووبەڕووی مەترسیەکان دەبینەوە".

 

بۆچی گرنگە؛ لە ماوەی ڕابردوو پارتی دیموکراتی کوردستان و یەکێتیی نیشتمانیی کوردستان لەسەر بارودۆخی ئێستای هەرێمی کوردستان و هێرشە درۆنیەکان بۆ سەر کێڵگە نەوتییەکان و پرسی هەناردەکردنەوەی نەوت و مووچەی مووچەخۆران هاوڕا بوون، بەپرسانی هەردوولاش دووپاتی دەکەنەوە پەیوەندییەکانیان باشە و بەیەکەوە کار بۆ چارەسەری کێشەکان دەکەن.

 

لێدوانی فەرمی: ئاری هەرسین، بەرپرسی لقی چواری پارتی دیموکراتی کوردستان بە ئاڤا میدیای گوت، هەر کاتێک کورد یەک دەنگ بووبێت سەرکەوتوو بوە، ئێستا پەیوەندییەکانی پارتی و یەکێتی زۆر باشە، لە ڕۆژانی ڕابردوو کۆبوونەوەی لوتکە بەڕێوەچوو، هیچ شتێک لە کوردستان لەوە گرنگتر نییە نێوانی ئێمە و یەکێتی باش بێت و بە هاوبەشی شان بخەینە بەر ئەو بەرپرسیاریەتیەی  ڕووبەڕوومان بووەتەوە و پێکەوە ڕووبەڕووی مەترسیەکان دەبینەوە. دەشڵێت، لە ئۆکسجین زەرورتر نێوانی پارتی و یەکێتییە.

 

- یەکڕیزی باشترین فاکتەرە بۆ پاڵپشتی نیودەوڵەتی، چونکە هیچ کەسێک پاڵپشتی لە میللەتێکی پەرتەوازە ناکات.

- پێویستە پەیوەندیی نێوان پارتی و یەکێتی بۆ ئۆرگانەکانی خوارەوەی هەردوولا شۆڕببێتەوە، چونکە پەیوەندی نێوانمان گەمەیەکی سیاسی نییە بەڵکو هەنگاوێکی ستراتیژییە بۆ بەرژەوەندی گشتیی هەرێمی کوردستان.

 

- ئەوانەی لە هەرێمی کوردستان بەخۆیان دەڵێن ئۆپۆزسیۆن ، ئۆپۆزسیۆن نین، ئەوانە دوو بەشن، بەشێکیان هیچیان نیە و هیچ بەرپرسیاریەتی نەچووەتە سەر شانیان و گووتاری پۆپۆلستیان هەیە و خەڵکی پی چەواشە دەکەن، بەشەکەی دیکەیان دەچنە خانەی خیانەت.

 

بەشێکی دیکە لە قسەکانی ئاری هەرسین: 

 

-  پەیوەندییە تەلەفۆنییەکەی مارکۆ ڕۆبیۆ و سوودانی کاریگەری دەبێت لەسەر بڕیارەکان لە بەغدا، گرنگە ئەم جۆرە پەیوەندییانە بەردەوام بێت و ئەمریکا بەردەوام بە کردار هەڵوێستی هەبێت.

-   گرنگە هەرێمی کوردستان هاوپەیمانی ئەمریکا بێت، بەهۆی جیۆپۆلۆتیکی کوردستان و بارودۆخی سیاسی و ئەمنی ڕۆژهەڵاتی ناوەرست، ئەم هاوپەیمانیەش لە بەرژەوەندی هەردوولا و ناوچەکەیە.

-  بۆ بەرقەرابوونەی ئاشتی و پرۆسەی سەقامگیریی ناوچەکە دەتوانین ڕۆڵی کاریگەر ببینین، ڕۆڵی هەرێمی کوردستان لە پرۆسەی ئاشتی لە تورکیا نمونەیەکی زیندووە لەسەر ئەم بابەتە.