بۆ دامەزراندنی دەرچووانی کۆلێژە پزیشکییەکان نووسراو ئاراستەی ئەنجوومەنی ڕاژە دەکرێت

ئاڤا نیوز

وەزارەتی تەندروستی عێراق بە فەرمی داوای دامەزراندنی ئەو دەرچووانەی ساڵی خوێندنی 2022-2023ـی کۆلێژ و پەیمانگا پزیشکییەکانی زانکۆکانی عێراق و هەرێمی کوردستانی کرد کە تائێستا دانەمەزراون.

نووسراوی فەرمی: ڕۆژی 8ـی ئەم مانگە وەزارەتی تەندروستی عێراق لە نووسراوێکدا کە ئاراستەی  ئەنجوومەنی ڕاژەی فیدراڵی کردووە، ئاماژەی بەوەکردووە، داوا لە ئەنجوومەنەکە دەکات دەرچووانی ساڵی خوێندنی 2022-2023 ـی زانکۆکان لە بەشی پزیشکی ددان و دەرمانسازی، دەرچووانی کۆلێژە تەکنیکییەکان (بەشی شیکاری نەخۆشییەکان و بەڵگەی تاوان) و پەیمانگا پزیشکییەکان (بەڵگەی تاوان، ئامێری پزیشکی، شیکاری نەخۆشییەکان و پشکنینی چاو)، کە تائێستا دانەمەزراون بڕیاری دامەزراندنیان بۆ دەربچێت تا لە دامەزراوەکانی وەزارەتەکەیان جێگەیان بۆ بکرێتەوە.

زانیاریی زیاتر: بەگوێرەی نوسراوەکە بڕیاری دامەزراندنەکە تەنیا ئەو کەسانە دەگرێتەوە کە ساڵی خوێندنی 2022-2023 دەرچوون و دانەمەزراون، هاوکات بڕیارەکە دەرچووە دانەمەزراوەکانی ئەم بەشانە لە ناوخۆ و دەرەوەی عێراق و کۆلێژەکانی هەرێمی کوردستانیش دەگرێتەوە.

دەقی نووسراوەکەی وەزارەتی تەندروستی عێراق بە زمانی عەرەبی