ڕاغب عەلامە بەهۆی "ماچ"ـێکەوە تووشی کێشە دەبێت و ئاهەنگەکانی ڕادەگیرێن

ئاڤا نیوز

ڕاغب عەلامە هونەرمەندی ناسراوی لوبنانی لە کۆتا ئاهەنگیدا لە میسر لەگەڵ کچە هەوادارێکیی یەکتریان ماچ کرد، لە چەند ڤیدیۆیەکی دیکەشدا دەردەکەوێت کە لەگەڵ چەند کچە هەوادارێکی سەما دەکات، ئەوەش بوو بە کێشە بۆیی و سەندیکای میوزیکژەنانی میسر بڕیاریدا لە ناوبراو لە سازکردنی ئاهەنگ لە وڵاتەکەیدا ڕابگرێت.

چیرۆکی سەرەکی: ڕاغب عەلامە لە کۆتا ئاهەنگیدا لە میسر کاتێک هەوادارێکی دێتەسەر ستەیج و دەیەوێت وێنەی لەگەڵدا بگرێت، دوای وێنەگرتنەکەش هونەرمەندەکە ماچ دەکات و  ڕاغب عەلامەش لە باوەشی دەگرێت، ئەوەش لە شەقامی میسریدا دوو ڕۆژە بابەتی گەرمە و بەشێکیان دەڵێن، میسر جێگەی ئەو جۆرە ڕەفتارانەی تێدا نابێتەوە.

کاردانەوەکان: سەندیکای موزیکژەن و هونەرمەندانی میسر ڕووداوەکەی بە شەرمەزارکەر ناوبردووە و ڕایگەیاند، ئەو ڕەفتارە لەگەڵ دابونەریت و کولتووری میسردا ناگونجێت، بەوهۆیەش بڕیاریدا هونەرمەند ڕاغب عەلامە لە سازکردنی ئاهەنگ لە میسر ڕابگیرێت.

بۆچوونی لایەنی بەرامبەر: ڕاغب عەلامە لەبارەی ڕووداوەکە ڕایگەیاند، بڕیارەکە جێگەی سەرسوڕمانە لە وڵاتێکی وەک میسر کە وڵاتی خۆشەویستی، گەشتیاریی، هونەر و داهێنانە، میسر ئەوانی فێری کرانەوە و هونەر و خۆشەویستی هەواداران کردووە، ئەگەر هەوادارێکیش کە هەموو ئاواتی ئەوەبێت هونەرمەندێک ببێنێت و لە دیمەنێکی بێ مەبەستدا ڕەفتارێک بنوێنێت، ئەو شتەی شایستەی ئەو هەموو هەرایە نییە.

"کێشەکە چارەسەرکراوە و سەندیکای هونەرمەندانی میسر هاتووەتەسەر هێڵ، ئەوەی ڕوویداوە هیچ هەڵەیەکی تێدانەبووە کە پێچەوانەی ئادابی گشتی بێت و هەڵە تێگەیشتن بووە، بۆیەش دووپاتی دەکەمەوە کە ئەم بابەتە لە قەبارەی خۆی زیاتر گەورەکراوە".

بڵاوکراوەی فەرمی: ڕاغب عەلامە لە بڵاوکراوەیەکدا کە لە هەژماری خۆی لە تۆڕی ئێکس بڵاویکردووەتەوە باسی لەوەکردووە، لەگەڵ نەقیبی سەندیکای موزیکژەن و هونەرمەندانی میسر قسەیکردووە و بەڕێز و پێزانینەوە ڕوونکردنەوەی پێداون، کە ئەوەی ڕوویداوە هەڵەی ئەو نییە، بەڵکو بەرپرسیاریەتی لەسەر شانی ڕێکخەری ئاهەنگەکە و لایەنەکانی دیکەیە، ئەوان پێویستە ئامادەبووان کۆنتڕۆڵ بکەن و ئەگەریش پێویست بکات سنوور لەنێوان هونەرمەندەکە و لایەنگرانیدا دابنێن.