هیومان ڕایتس وۆچ: حووسییەکان تاوانی جەنگ ئەنجام دەدەن

ئاڤا نیوز

ڕێکخراوی هیومان ڕایتس وۆچ، هێرشی حووسییەکان بۆ سەر کەشتییەکان لە دەریای سوور بە "تاوانی جەنگ" ناوبرد، داوای ڕاگرتنی دەستبەجێی ئەو هێرشانە و ئازادکردنی دەستگیرکراوەکانی کرد.

چیرۆکی سەرەکی: حووسییەکانی یەمەن، هەردوو کەشتیی بارهەڵگری "ماجیک سیز" و "ئیتێرنیتی سی"ـیان لە دەریای سوور کردە ئامانج، بەپێی ڕاگەیاندنی ئەرکی یەکێتیی ئەوروپا بۆ پاراستنی هاتووچۆی دەریایی و کەشتییە بازرگانییەکان "ئەسپیدس" لە کۆی 25 کارمەندی کەشتیی "ئیتێرنیتی سی"، چواریان گیانیان لەدەستداوە 10 کارمەند ڕزگار کراون و یازدەی دیکەشیان تاوەکو ئێستا بێسەروشوێنن.

ڕاگەیێنراوی فەرمی: ڕۆژی چوارشەممە 23-7-2025، ڕێکخراوی هیومان ڕایتس وۆچ لە ڕاگەیێنراوێکدا، سەرکۆنەی هێرشی حووسییەکانی یەمەنی بۆ سەر کەشتییە بازرگانییەکان لە دەریای سووردا کرد، کە تەنیا لەم مانگەدا بوونە هۆی نوقمبوونی دوو کەشتیی بازرگانی.

زانیاریی زیاتر: ڕێکخراوەکە ڕایگەیاند، حووسییەکان بە ئەنقەست هێرشیان کردووەتە سەر ئەو کەشتییە بازرگانییانەی کە بەهیچ شێوەیەک بەشدارییان لە هیچ چالاکییەکی سەربازیدا بۆ سەر هێزەکانی حووسی نەکردووە.

قووڵتر: لەبەشێکی دیکەی ڕاگەیێنراوەکە، هیومان ڕایتس وۆچ ڕوونی کردەوە، ئەم هێرشانە پێشێلکاریی یاساکانی جەنگن و دەچنە ئاستی تاوانی جەنگەوە. هاوکات ئاماژەی بەوەش کرد، دەستبەسەرکردنی کارمەندانی مەدەنی کەشتییەکان دوای ڕزگارکردنیان قەدەغەیە.

لەلایەکی دیکەوە: بەپێی زانیارییەکانی ناوەندی زانیاریی دەریایی هاوبەش، کە سەر بە هاوپەیمانییەکی دەریایی ڕۆژئاوایە، حووسییەکان لە مانگی تشرینی دووەمی 2023ـەوە زیاتر لە 100 هێرشیان بۆ سەر کەشتییەکان لە دەریای سوور و کەنداوی عەدەن ئەنجام داوە.