نوێنەرانی ئەمریکا و ئیسرائیل و قەتەر لە ڕۆما لەبارەی غەززە کۆدەبنەوە

ئاڤا نیوز

چاوەڕوان دەکرێت سبەی پێنجشەممە، ستیڤ ویتکۆف، نوێنەری تایبەتی ئەمریکا بۆ کاروباری ڕۆژھەڵاتی ناوەڕاست و ڕۆن دێرمیر، وەزیری کاروبارە ستراتیژییەکان و نوێنەری قەتەر بۆ گفتوگۆکردنى دانوستانەکانی تایبەت بە ئاگربەست لە کەرتی غەززە و ئاڵوگۆڕی دیلەکانی نێوان ئیسرائیل و حەماس، لە ڕۆما کۆببنەوە.

زانیاریی بەدەستهاتوو: ڕۆژنامەی "یەدیعوت ئەحرەنووت"ـی ئیسرائیلی بڵاوی کردەوە کە سبەی پێنجشەممە، ستیڤ ویتکۆف، نوێنەری تایبەتی ئەمریکا بۆ کاروباری ڕۆژھەڵاتی ناوەڕاست لە ڕۆما لەگەڵ ڕۆن دێرمیر، وەزیری کاروبارە ستراتیژییەکان و نوێنەری قەتەر کۆدەبێتەوە.

زانیاریی زیاتر: بەگوێرەی هەمان سەرچاوە، ئەگەر لە کۆبوونەوەکەدا، بەرەوپێشچوون بەدیھات، ئەوا ستیڤ ویتکۆف بۆ واژۆکردنی ڕێککەوتنی ئاگربەست لە غەززە و ئاڵوگۆڕی دیلەکان لەنێوان ئیسرائیل و حەماس، سەردانی دەوحە دەکات.

لەلایەکی دیکەوە: دوێنێ سێشەممە وەزارەتی دەرەوەی ئەمریکا ڕاگەیاندبوو کە ستیڤ ویتکۆف سەردانی ڕۆژھەڵاتی ناوەڕاست دەکات، ئەوەش بە ئامانجی ئەنجامدانی دانوستان لەبارەی کردنەوەی ڕێڕەوی گەیاندنی یارمەتییە مرۆییەکان بۆ غەززە و ئاگربەست لەو کەرتە.