سەرپەرشتیاری میوانەكانی كۆڕبەندی جیهانی داڤۆس: هێرشەكەی ئێران بۆ سەر هەولێر شۆكی كردین

ئاڤا دیجیتاڵ

سەرپەرشتیاری میوانەكانی كۆڕبەندی جیهانی داڤۆس رایگەیاند،  هەواڵی "هێرشەكەی ئێران بۆ سەر هەولێر شۆكی كردین و سەركۆنەی دەكەین، كوردستان هەرێمێكی ئارامە و هێرشەكان هیچ ناگۆڕێت".

چیرۆكە سەرەكییەكە: كاردانەوەكان لەسەر هێرشە مووشەكییەكەی هەولێر بەردەوامن و سەرپەرشتیاری میوانەكانی كۆڕبەندی داڤۆس كە زیاتر لە 100 وڵاتی جیهان تێیدا بەشدارن، سەركۆنەی هێرشەكە دەكات و بوونی شاندی هەرێمی كوردستان لە كۆڕبەندەكە بە گرنگ وەسف دەكات.

لێدوانی فەرمی: "بە هەواڵی هێرشكردنە سەر هەولێر شۆك بووم لەكاتێكدا كە 100 وڵاتی گەورەی جیهان لە داڤۆس لەكۆبوونەوەدان بۆ چارەسەركردنی كێشەكانی جیهان، هێرشەكە كراوە و ئەمە جێگای نیگەرانییە، هێرشەكەی ئێران سەركۆنە دەكەین، نازانم چۆن گۆزارشت لەو هێرشە بكەم". جۆرج جۆسڤكی، سەرپەرشتیاری میوانەكانی كۆڕبەندی جیهانی داڤۆس ئەمەی بە ئاڤا میدیا گوت.

زانیاری زیاتر: "كوردستان هەرێمێكی ئارامە و هێرشەكان هیچ ناگۆڕێت، بەشداری شاندی حكومەتی هەرێمی كوردستان و دیدارەكانی سەرۆكوەزیرانی هەرێمی كوردستان لە داڤۆس بۆ پەرەپێدانی ژێرخانی ئابووری هەرێمەكەتان (هەرێمی كوردستان) زۆر گرنگن". ئەمەش هەر بە پێی گوتەی سەرپەرشتیاری میوانەكانی كۆڕبەندی جیهانی داڤۆس.

ئەوەی پێویستە بزانیت: 54  ەمین كۆبوونەوەی ساڵانەی كۆڕبەندی ئابووری جیهانی داڤۆس، لەژێر ناونیشانی "بونیادنانەوەی متمانە" لە رۆژی 15 ئەم مانگەوە دەستی بە كارەكانی كردووە و و فەزایەكی گرنگ دەرەخسێنرێت بۆ گرنگیدان بە بنەما بنەڕەتییەكانی "متمانە، شەفافیەت، یەكدەنگی و لێپرسینەوە"، حكومەتی هەرێمی كوردستان بە سەرپەرشتی سەرۆكوەزیران بارزانی تێیدا بەشدارە و ڕۆڵیكی گرنگ لە كۆڕبەندەكەدا دەگێڕێت، تاوەكو 19ی ئەم مانگە بەردەوام دەبێت.

 

 

باكگراوند: درەنگانی شەوی دووشەممە 2024-01-15، سوپای پاسدارانی ئێران بە چەند مووشەكێكی بالیستی هێرشی كردە سەر هەولێر و چەند ناوچەیەكی مەدەنی كردە ئامانج، بەهۆیەوە پێنج كەس گیانیان لەدەستداو شەش كەسیش برینداربوون.