لە شەش پارێزگای عێراق پلەکانی گەرما دەگەنە نیوەی کوڵان

ئاڤا نیوز

دەستەی کەشناسیی عێراق، وردەکاریی کەشوهەوای بۆ ڕۆژانی داهاتوو ڕاگەیاند و هاوکات پێشبینیی بەرزبوونەوەی پلەکانی گەرما لە شەش پارێزگا بۆ نیوەی کوڵان دەکات.

ڕاگەیێنراوی فەرمی: بەگوێرەی ڕاگەیەندراوی دەستەکە کە وێنەیەکی دەست ئاڤا میدیا کەوتووە، هاتووە: "سبەی هەینی کەشوهەوا ساماڵ دەبێت لەگەڵ بوونی هەندێک پەڵەهەور و پلەکانی گەرما لە سەرجەم ناوچەکانی وڵاتدا هاوشێوەی ئەمڕۆ دەبن."

لەلایەکی دیکەوە: شێخ دارا، شارەزا و پێشكەشكاری كەشوهەوای ئاڤا میدیا ڕایگەیاند: ئەو شەپۆلە گەرمایە بۆ ماوەی دوو ڕۆژ بەردەوام دەبێت، لە هەرێمی کوردستان بەرزترین پلەی گەرما کە تۆمار دەکرێت لە ناوچەی گەرمیان 47.4 پلە دەبێت، نزمترین پلەش لە حاجی ئۆمەران تۆمار دەکرێت.

پێشبینییەکان بۆ سبەی: بەرزترین پلەکانی گەرما بۆ سبەی هەینی بەم شێوەیە دەبن:

بەغدا، دیالە، بابل، کەرکووک، سەلاحەدین و نەجەف: 48 پلە

کەربەلا و هەولێر: 47 پلە

ئەنبار و سلێمانی: 46 پلە

دهۆک: 45 پلە

نەینەوا، دیوانییە، واست، ناسریە و موسەننا: 49 پلە

میسان و بەسڕە: 50 پلە

پێشبییەنیەکانی بۆ ڕۆژانی داهاتوو:

ڕۆژی شەممە کەشوهەوا بە گشتی ساماڵ دەبێت، جگە لە بەشەکانی ڕۆژهەڵاتی ناوچەی باکوور کە هەندێک جار نیمچەهەور دەبێت. پلەکانی گەرما لە ناوچەکانی ناوەڕاست و باشوور کەمێک بەرز دەبنەوە و لە ناوچەی باکوور کەمێک نزم دەبنەوە.

ڕۆژی یەکشەممەی داهاتوو کەشوهەوا بە گشتی ساماڵ دەبێت، جگە لە بەشەکانی ڕۆژهەڵاتی ناوچەی باکوور کە هەندێک جار نیمچەهەور دەبێت، پلەکانی گەرما لە سەرجەم ناوچەکان کەمێک بەرز دەبنەوە.

کەشوهەوای ڕۆژی دووشەممە، ئاسمان ساماڵ دەبێت لەگەڵ بوونی هەندێک پەڵەهەور، پلەکانی گەرما لە سەرجەم ناوچەکان هاوشێوەی ڕۆژی پێشوو دەبن.