هۆشدارییەك لە كەشناسیی هەرێمی كوردستانەوە بۆ مووچەخۆران

ئاڤا نیوز

بەپێی زانیارییەكانی بەڕێوەبەرایەتیی كەشناسیی هەرێمی كوردستان و دەستەی كەشناسیی عێراق لە سبەیەوە پلەكانی گەرما چەند پلەیەك بەرز دەبنەوە و لە هەندێك شوێن دەگاتە 50 پلەی سیلیزی، گوتەبێژی وەزارەتی گواستنەوەش لەو چوارچێوەیەدا هۆشدارییەك دەداتە مووچەخۆران سەبارەت بە كاتی وەرگرتنی مووچەکانیان.

لێدوانی فەرمی: دیلان ڕەشاد، گوتەبێژی وەزارەتی گواستنەوە و گەیاندن بە ئاڤا میدیای ڕاگەیاند: بەپێی پێشبینییەکانی بەڕێوەبەرایەتیی گشتیی كەشناسی و بوومەلەرزەزانیی هەرێمی كوردستان، لە ئەمڕۆوە تاوەكوو سێ ڕۆژی دیكە پلەكانی گەرما زۆر بەرز دەبنەوە، بۆیە وا باشترە مووچەخۆران لە كاتەكانی ئێواران و شەوان ئامێرەكانی ATM بەکار بهێنن بۆ ڕاکێشانی پارەکانیان لەبەر سەلامەتیی  گشتی و دوورکەوتنەوە لە بەرکەوتنی تیشکی خۆر لە ڕۆژدا.

لەلایەكی دیكەوە: شێخ دارا، شارەزا و پێشكەشكاری كەشوهەوای ئاڤا میدیا ڕایگەیاند: ئەو شەپۆلە گەرمایە بۆ ماوەی دوو ڕۆژ بەردەوام دەبێت، لە هەرێمی کوردستان بەرزترین پلەی گەرما کە تۆمار دەکرێت لە ناوچەی گەرمیان 47.4 پلە دەبێت، نزمترین پلەش لە حاجی ئۆمەران تۆمار دەکرێت.

ئەوەی پێویستە بیزانیت: بەپێی ڕاگەیێنراوی بەڕێوەبەرایەتیی كەشناسیی هەرێمی كوردستان و دەستەی كەشناسیی عێراق، سبەی بەرزترین پلەی گەرما دەگاتە 50 پلەی سیلیزی، لە هەرسێ پارێزگای  میسان و بەسرە و كەركووك ئەو پلەیە تۆمار دەكرێت.