وەزارەتی دارایی: لێبڕینی بڕێک پارە لە مووچەی فەرمانبەران لەسەر داواکاری وەزارەتی پلاندانانی عێراق بووە

ئاڤا نیوز

لەبارەی لێبڕینی بڕێک پارە لە مووچەی ئەم مانگەی فەرمانبەرانی هەرێمی کوردستان، وەزارەتی دارایی دەڵێت، ئەمە لەسەر داوای وەزارەتی پلاندانانی عێراق بووە و تەنیا بۆ یەک مانگە.

چیرۆکی سەرەکی: سەرەڕای دواخستنی مووچەی فەرمانبەران لەلایەن بەغداوە، ئەم مانگە سەرجەم مووچەخۆران لەکاتی ڕاکێشانی مووچەکانیان، بەراورد بە مانگەکانی ڕابردوو بڕێک پارەیان کەمتر وەرگرت. وا بڵاوکرایەوە ئەم لێبڕینە پەیوەندی بە پڕۆژەی "هەژماری من" هەبێت، بەڵام وەزارەتی دارایی و ئابووری کوردستان ئەمە بە تەواوی ڕەت دەکاتەوە.

ڕاگەیێنراوی فەرمی: بەڕێوەبەرایەتی گشتی ژمێرکاری - وەزارەتی دارایی و ئابووری هەرێمی کوردستان ڕایگەیاند. ئەو بڕە پارەیەی لە مووچەی فەرمانبەران بڕاوە %1ـی مووچەی بنەڕەتی فەرمانبەرانە، ئەمەش لەسەر داواکاری وەزارەتی پلاندانانی عێراق بووە بەمەبەستی تۆمارکردن و دروستکردنی ژمارەی وەزیفی لەلایەن وەزارەتی دارایی حکومەتی فیدراڵی. کە لە ڕۆژی 2024-12-18 بە ژمارە (24972) ئەنجومەنی وەزیرانی عێراق بڕیاری لێداوە. بۆیە هیچ پەیوەندی بە پڕۆژەی هەژماری من نییە، وەک ئەوەی کە بڵاوکراوەتەوە.

زانیاریی زیاتر: وەزارەتی دارایی و ئابووری هەرێمی کوردستان دەڵێت، ئەم لێبڕینە تەنیا بۆ مانگی پێنج بووە، واتا بەردەوام نابێت. تەنیا فەرمانبەرانی هەمیشەیی و ئەو فەرمانبەرە گرێبەستانە دەگرێتەوە کە مووچەکانیان لەلایەن وەزارەتی دارایی فیدراڵەوە خەرج دەکرێت، بەهیچ جۆرێک خانەنشینان و سوودمەندانی چاودێری کۆمەڵایەتی ناگرێتەوە.