ساڵێک بەسەر دەستپێکی پڕۆژەی ڕووناکی تێپەڕی

ئاڤا نیوز

تیمی پڕۆژەی ڕووناکی دەڵێن، ئەمڕۆ 25ـی تەمموز ساڵێک تێپەڕی بەسەر دەستپێکی پڕۆژەی ڕووناکی، پڕۆژەکە بەردەوامی هەیە و تا ئێستا دوو ملیۆن هاونیشتمانی لەو پڕۆژەیە سوودمەندن.

وێنە گەورەکە: پڕۆژەی ڕووناکی یان کارەبای 24 کاتژمێری یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان. ڕۆژی 2024-07-25 دەستیپێکرد و ڕۆژی 2024-10-17 مەسرور بارزانی، سەرۆکوەزیرانی کوردستان لە گەڕەکی شادی هەولێر پڕۆژەکەی ڕاگەیاند و ئامانجەکە ئەوەیە تا 2026 کارەبای تەواوی کوردستان ببێتە 24 کاتژمێری.

ڕاگەیێنراوی فەرمی: تیمی پڕۆژەی ڕووناکی ئەمڕۆ هەینی ڕایانگەیاند، "ساڵێک تێپەڕی بەسەر دەستپێکردنماندا و ساڵێک زیاتر لە ئامانجەکانمان نزیکتربووینەوە. پڕۆژەی ڕووناکی بەردەوامیی دەبێت و هەموو ماڵێکی کوردستان ڕووناکتر دەکاتەوە".

ژمارەکان وادەڵێن: بەگوێرەی دوایین ئاماری تیمی پڕۆژەی ڕووناکی. تا ئێستا کارەبای 24 کاتژمێری گەیشتووەتە دوو ملیۆن هاونیشتمانی. زیاتر لە 150 گەڕەک و 90 هەزار شوێنی بازرگانی کارەبای پڕۆژەی ڕووناکیان پێگەیشتووە. ئەمە جگە لەوەی دوو هەزار و 100 مۆلیدە کوژێنراونەتەوە.