ئەردۆغان: هەوڵ دەدەم ئەم هەفتەیە لەگەڵ پووتین و ترەمپ لە ئیستەنبووڵ کۆببمەوە

ئاڤا نیوز

لەچوارچێوەی هەوڵەکانی تورکیا بۆ نێوەندگیری و گەیشتن بە ئاگربەست لەنێوان ڕووسیا و ئۆکرانیا، ڕەجەب تەیب ئەردۆغان، سەرۆککۆماری تورکیا دەڵێت، "هەوڵ دەدەین سەرۆکانی ئەمریکا و ڕووسیا لە ئیستەنبووڵ کۆبکەینەوە و ڕەنگە ئەم هەفتەیە لەگەڵ پووتین و ترەمپ لە ئیستەنبووڵ کۆببینەوە".

لێدوانی فەرمی: ئەردۆغان لەبارەی سێیەم گەڕی دانوستاندنەکانی نێوان ئۆکرانیا و ڕووسیا لە ئیستەنبووڵ گوتی: "هاکان فیدان، وەزیری دەرەوەی تورکیا وەک نوێنەری من سەرپەرشتی کۆبوونەوەکەی کرد. پێش دەستپێکردنی دانیشتنەکە، من پێشوازیم لە شاندی ئۆکرانیا کرد و لەگەڵیان کۆبوومەوە. هەر لەو کاتەدا، بە تەلەفۆن لەگەڵ ڤلادیمیر پووتین قسەم کرد و داوام لێکرد پشتیوانی دانوستاندنەکان بکات."

سەرۆککۆماری تورکیا لە درێژەی قسەکانیدا گوتیشی: "دوای ئەم قۆناغە، بەتایبەتی ئەم هەفتەیە، جارێکی دیکە لەگەڵ بەڕێز پووتین قسە دەکەمەوە و هەوڵ دەدەم لەگەڵ هەردوو سەرکردە، پووتین و ترەمپ، لە ئیستەنبووڵ کۆببینەوە."

بۆچوونی لایەنی بەرامبەر: دۆناڵد ترەمپ، سەرۆکی ئەمریکا، لە کۆنگرەیەکی ڕۆژنامەوانیدا سەبارەت بە کۆبوونەوەی نێوان ڤلادیمیر پووتین، سەرۆکی ڕووسیا و ڤۆڵۆدیمیر زێلێنسکی، سەرۆکی ئۆکرانیا، ڕایگەیاند: "پێویست بوو سێ مانگ لەمەوبەر ئەو کۆبوونەوەیە ئەنجام بدرایە، بەڵام هێشتاش دەکرێت."

باکگراوند: ڕۆژی چوارشەممە، 23ی تەممووز، سێیەم گەڕی دانوستاندنەکانی نێوان ئۆکرانیا و ڕووسیا لە ئیستەنبووڵ بەڕێوەچوو، کە تێیدا لەسەر ئاڵوگۆڕکردنی 1200 دیلی سەربازی لەنێوان هەردوو وڵاتدا ڕێککەوتن کرا.