حەماس وەڵامی ترەمپ دەداتەوە: ئاگربەستمان دەوێت بەڵام هیچ پێشنیازێکمان پێنەگەیشتووە

ئاڤا نیوز

 

بزووتنەوەی حەماسی فەلەستینی وەڵامی لێدوانەکانی دۆناڵد ترەمپ، سەرۆکی ئەمریکای دەداتەوە و دەڵێت، ''جێی سەرسوڕمانە کە [ترەمپ] پێی وایە حەماس ئاگربەستی ناوێت، چونکە ئێمە هیچ پێشنیازێکمان بۆ نەهاتووە.''

 

چی ڕووی دا: دانوستاندنەکانی نێوان ئیسرائیل و حەماس پێشکەوتنیان بەخۆیەوە نەبینیووە، بەهۆی ئەمەشەوە بۆ یەکەمجار دۆناڵد ترەمپ، سەرۆکی ئەمریکا بە ئاشکرا دەڵێت، حەماس نایەوێت ڕێککەوتن لەبارەی ئاگربەستی غەززە و ئازادکردنی دیلەکان بکات، بەڵکوو مردنی دەوێت، بۆیە پێم وایە ئەو بزووتنەوەیە دەڕووخێت.

 

لێدوانی فەرمی: تاهر نونو، فەرماندەی باڵای حەماس ڕایگەیاند، هیچ پێشنیازێک بۆ ئاگربەستی غەززەیان لە لایەنی بەرانبەر و لەلایەن نێوەندگیرەکانەوە پێنەگەیشتووە ئێمە هەوڵی خۆمان بۆ ئاگربەست داوە.

 

فەرماندە باڵاکەی حەماس ستایشی ڕۆڵی نێوەندگیرەکان دەکات و دەڵێت، قەتەر و میسر هەوڵی زۆر دەدەن بۆ گەیشتنە ڕێککەوتن. هاوکات تاهر نونو ئامادەیی بزووتنەوەی حەماس بۆ دانوستاندن و کۆتاییهێنان بە شەڕی غەززە دەردەبڕێت.

 

گۆشەیەکی دیکەی دیمەنەکە: بنیامین نەتانیاهۆ، سەرۆکوەزیرانی ئیسرائیل، بزووتنەوەی حەماسی بەوە تۆمەتبار کرد، کە نایەوێت ڕێککەوتن لەبارەی ئازادکردنی دیل و بارمتەکان بکات.