فایلی خەڵک؛ گەڕەکی بارزان لە سۆران بەهۆی خراپی ڕێگا زۆربەی ماڵەکان چۆڵ دەکرێن

ئاڤا نیوز

گەڕەکێکی سۆران کێشەیان هەیە و بەهۆی ئەو کێشەیەوە زۆربەی ماڵەکان چۆڵیان کردووە. دانیشتووانەکەی دەڵێن، نە تاکسی و نە ئۆتۆمبێلی غاز لەبەر خراپی ڕێگا نایەنە گەڕەکە.

وێنە گەورەکە: گەڕەکی بارزان لە سۆران کە 100 ماڵە، ماوەی 13 ساڵە داوای چاککردن و قیرتاوکردنی گەڕەکەکەیان دەکەن، بەڵام تاوەکو ئێستا چاک نەکراوە.

زانیاریی پەیامنێر: هاوار عەباس، پەیامنێری ئاڤا میدیا بەدواداچوونی بۆ کێشەکە کردووە، موخلیس مەهاجیر کە دانیشتووی گەڕەکەکەیە و دەڵێت، نە تاکسی دێتە کۆڵانەکەمان و نە ئۆتۆمبێلی غازەکە، زۆربەی ماڵەکان لەبەر خراپی ڕێگا چۆڵیان کردووە و خانووەکانیان بەجێهێشت.

لێدوانی فەرمی: ڕەجەب زوبێر، قایمقامی ناوەندی سۆران بە ئاڤای ڕاگەیاند، پڕۆژەکە تەندەرینی بۆ کراوە و کۆمپانیایەک وەریگرتووە، بەڵام بەهۆی نەبوونی پارەی کاش نەتوانراوە دەست بە کارەکان پێبکرێت.

دەشڵێت، "هەموو هەوڵک دەدەین کە بە زووترین کات کۆڵانەکانی ئەم گەڕەکە قیرتاو بکەین".