سەرۆكی فەرەنسا پشتیوانی خۆی بۆ هەرێمی كوردستان دووپات كردەوە

ئاڤا دیجیتاڵ

سەرۆكوەزیران بارزانی  لە داڤۆس،  لەگەڵ  ئیمانوێل ماكڕۆن سەرۆكی فەرەنسا كۆبووەوە، سەرۆكی فەڕەنسا پشتیوانی خۆی بۆ هەرێمی كوردستان دووپاتكردەوە.

چیرۆكە سەرەكییەكە: تەوەرێكی سەرەكی كۆبوونەوەكە تایبەت بوو بە هێرش و پەلامارەكانی ئێران بۆ سەر هەولێر كە هەڕەشەیەكی ڕاستەقینەیە بۆ سەر هەرێمی كوردستان و پێشێلكارییەكی ئاشكرای سەروەری عێراق و هەرێمی كوردستانە، "هەردوولا هاوڕابوون لەسەر گرنگیی پاراستنی ئاسایش و سەقامگیریی عێراق و هەرێمی كوردستان". 

لێدوانی فەرمیی: "سەرۆك ماكرۆن هاوخەمیی قووڵی خۆی بە سەرۆكی حكومەت گەیاند  و پشتگیریی تەواوی وڵاتەكەی بۆ  هەرێمی كوردستان دووپات كردەوە". سەرۆكوەزیران بارزانی سوپاسی سەرۆك ماكرۆن و فەرەنسای كرد بۆ هاوخەمیی و پشتیوانیی بەردەوامیان لە هەرێمی كوردستان كە لە قۆناغە جیاوازەكاندا ، فەرەنسا هەمیشە پشتیوانیی لە گەلی كوردستان كردووە". 

بابەتە ستراتیژییەكان: گرنگیی چارەسەركردنی كێشەكانی هەرێمی كوردستان و حكومەتی فیدراڵ بە شێوەیەكی بنەڕەتی و لەسەربنەمای دەستوور، تەوەرێكی دیكەی گفتوگۆكان بوو.

باكگراوند: درەنگانی شەوی دووشەممە 2024-01-15، سوپای پاسدارانی ئێران بە چەند مووشەكێكی بالیستی هێرشی كردە سەر هەولێر و چەند ناوچەیەكی مەدەنی كردە ئامانج، بەهۆیەوە پێنج كەس گیانیان لەدەستداو شەش كەسیش برینداربوون.