بەمنزیکانە پارەی گەنمی جووتیارانی هەرێمی کوردستان خەرج دەکرێت

ئاڤا نیوز

وەزارەتی بازرگانی عێراق نووسراوێکی سەبارەت بەخەرجکردنی گوژمەیەکی دیکەی پارەی گەنمی جووتیاران ئاراستەی وەزارەتی دارایی کردووە، هەرێمی کوردستانیش دەگرێتەوە.

وێنە گەورەکە: پرۆسەی بەبازاڕکردنی گەنمی ئەمساڵ لە هەرێمی کوردستان کۆتایی هات و زیاتر لە 390 هەزار تۆن گەنم وەرگیرا، ئەو گەنمەشی ماوەتەوە دوو کۆمپانیای ناوخۆیی وەریدەگرن، بەڵام تاوەکو ئێستا هیچ بڕە پارەیەک وەک شایستەی دارایی جووتیاران خەرجنەکراوە، لەکاتێکدا لە سێ بەشی پارەی جووتیارانی پارێزگاکانی عێراق خەرجکراوە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "لەدوای 10ـی شەشەوە هیچ گوژمەیەک وەک شایستەی دارایی جووتیارانی عێراق خەرجنەکراوە، بڕیارە لەگەڵ خەرجکردنی گوژمەیەکی دیکە هی جووتیارانی هەرێمی کوردستانیش بنێردرێت."

ژمارەکان وادەڵێن: ئەو 400 هەزار تۆنەی لە جووتیارانی هەرێمی کوردستانی وەرگیرا، بەمشێوەیە بەسەر چوار پارێزگاکەی هەرێمی کوردستان دابەشدەبێت:-

هەولێر: 122 هەزار و 600 تۆن.
سلێمانی: 145 هەزار و 567 تۆن.
دهۆک: 117 هەزار و 911 تۆن.
هەڵەبجە: 13 هەزار و 923 تۆن.