لە بەغدا ڕووبەڕووبوونەوە لەنێوان هێزە ئەمنییەکان و ژمارەیەک چەکدار دروستدەبێت؛ بریندار هەیە

ئاڤا نیوز

 

سەرلەبەیانی ئەمڕۆ لە بەغدا و لەکاتی دەستبەکاربوونی بەڕێوەبەری یەکێک لە فەرمانگەکانی وەزارەتی کشتووکاڵ، ژمارەیەک چەکدار دەوری باڵەخانەکە دەدەن، دواتریش هێزێکی وەزارەتی ناوخۆ دەگاتە شوێنەکە و شەڕ و ڕووبەڕوبوونەوە لەنێوان هەردوولادا دروستدەبێت، لە ئەنجامیشدا ژمارەیەک کارمەندی پۆلیس برینداربوون و 14 چەکداریش دەستگیرکران.

وێنە گەورەکە: ماوەی چەندین ساڵە هۆشداری بە حکومەتی عێراق دراوە کە بەردەوامی مانەوەی چەک لە دەستی دەوڵەت و بوونی گرووپی چەکداری جیاواز، هەڕەشەیە بۆسەر سەروەری توانای دەوڵەت بۆ کۆنتڕۆڵکردنی ئاسایش و جێبەجێکردنی یەک سیاسەتی دەرەوە، پێشتریش سەرۆکوەزیران ڕایگەیاندبوو، ڕێگە بەهیچ گرووپێک نادەن باز بەسەر بڕیاری دەوڵەتدا بدات بۆ هێشتنەوەی چەک تەنیا لە دەستی دەوڵەت.

ڕاگەیێنراوی فەرمی: وەزارەتی ناوخۆی عێراق لە ڕاگەیێنراوێکدا ئاماژەی بەوەشکردووە، ئەمڕۆ لە یەکێک لە فەرمانگەکانی وەزارەتی کشتووکاڵ لە بەشی کەرخی بەغدا و لەگەڵ دەستبەکاربوونی بەڕێوەبەری نوێی فەرمانگەکە پێشهاتێکی مەترسیدار ڕوویداوە، بەجۆرێک لەکاتی کۆبوونەوەی فەرمانگەدا گرووپێک چەکداری دەوری فەرمانگەکەیان داوە و ئەوەش ترسی لەلای فەرمانبەران دروستکردووە و پەیوەندییان بە هێزە ئەمنییەکانەوە کردووە.

ئەوەشی خستووەتەڕوو، دواتریش هێزێکی پۆلیسی فیدڕاڵی و فریاکەوتنی کەرخ چوونەتە شوێنەکە و لەلایەن ئەو چەکدارانەوە دەستڕێژی گولـلەیان لێکراوە، لە دەرئەنجامیشدا ژمارەیەک کارمەند و ئەفسەری هێزە ئەمنییەکان برینداربوون، هاوکات 14 چەکداریش دەستگیرکران و گەڕانیش بەدوای چەکدارەکانی دیکە بەردەوامە.

وەزارەتی ناوخۆی عێراق دەشڵێت، چاوپۆشی لە هیچ لایەنێک ناکەن بیەوێت بەهێز خۆی بسەپێنێت و هەڕەشە لەسەر دەوڵەت دروستبکات، بۆ پاراستنی ئارامیش ئەرکی خۆیان بەوپەڕی تواناوە جێبەجێ دەکەن.

لەلایەکی دیکەوە: فەرماندەیی ئۆپەراسیۆنە هاوبەشەکانی عێراق بڵاویکردەوە، لەسەر فەرمانی محەممەد شیاع سوودانی، فەرماندەی گشتی هێزە چەکدارەکان لیژنەی لێکۆڵینەوە لەسەر ڕووداوەکەی کەرخ پێکهێنراوە، تا بزانرێت چۆن هێزێکی چەکدار بەبێ فەرمان و ڕەزامەندیی فەرمی، جوڵەی پێکراوە و هەوڵی کۆنتڕۆڵکردنی باڵەخانەیەکی داوە و ڕووبەڕووی هێزە ئەمنییەکان بووەتەوە.

ئەوەشی خستووەتەڕوو، ئەو کەسانەی دەستگیرکراون لێکۆڵینەوەیان لەگەڵ کراوە و دەرکەوتووە سەر بە لیواکانی 45 و 46ی حەشدی شەعبین و ئێستا دەستگیرکراون، دواتریش ڕێکاریان لە دژ دەگیرێتەبەر.

ئەوەی لەبارەیەوە دەگوترێت: بەگوێرەی زانیارییەکان ئەندامەکانی هەرسێ لیوای 45 و 46 و 47ی حەشدی شەعبی، سەر بە گرووپی کەتائیبی حیزبوڵڵای عێراقین و ئەو گرووپە چەکدارییەش لە لیستی سزاکانی ئەمریکا دایە.