هێزێکی دژەتیرۆر بەرەو باشووری بەغدا چووڵەی پێکرا

ئاڤا نیوز

دوای پێکدادانە چەکدارییەکەی ئەمڕۆی بەغدا، بۆ هەر ئەگرێکی لە ناکاو هێزێکی دەزگای دژەتیرۆر بەرەو ناوچەکانی باشووری بەغدا جووڵەی پێکرا.

چیرۆکی سەرەکی: سەرلەبەیانی ئەمڕۆ یەکشەممە لە بەغدا و لەکاتی دەستبەکاربوونی بەڕێوەبەری یەکێک لە فەرمانگەکانی وەزارەتی کشتوکاڵ، ژمارەیەک چەکدار دەوری باڵەخانەکە دەدەن، دواتریش هێزێکی وەزارەتی ناوخۆ دەگاتە شوێنەکە و شەڕ و ڕووبەڕوبوونەوە لەنێوان هەردوولادا دروستدەبێت، لە ئەنجامیشدا ژمارەیەک کارمەندی پۆلیس برینداربوون و 14 چەکداریش دەستگیرکران.

زانیاریی بەدەستهاتوو: سەرچاوەیەکی ئەمنی کە قسەی بۆ میدیای عێراق کردووە ڕاگەیاند "لەبەر ئەگەری هەر دۆخێکی لەناکاو، هێزێکی دەزگای دژەتیرۆر جووڵەی پێکراوە بۆ شوێنی ئەو ڕووداوەی کە پێکدادانەکانی تێدا ڕوویدا لە باشووری بەغدا."

ئەوەی پێویستە بیزانیت: لەسەر ڕووداوەکانی باشووری بەغدا، وەزارەتی ناوخۆی عێراق دەستگیرکردنی 14 چەکداری ڕاگەیاند.

ڕاگەیێنراوی فەرمی: بەگوێرەی ڕاگەیێنراوی وەزارەتەکە "لە چوارچێوەی بەدواداچوونی بەردەوام بۆ ئەو ڕووداوەی کە بەیانی ئەمڕۆ لەناو یەکێک لە فەرمانگەکانی وەزارەتی کشتوکاڵ لە ناوچەی کەرخ ڕوویدا، ڕایدەگەیەنین کە ژمارەی ئەو تۆمەتبارانەی تا ئێستا دەستگیرکراون بۆ 14 کەس بەرزبووەتەوە، کە لە هێرشە چەکدارییەکەدا تێوەگلاون."