وەزیری دەرەوەی عێراق‌ گەیشتە نیویۆرک

ئاڤا نیوز

بە مەبەستی بەشداریكردن لە كۆنفڕانسێكی نێودەوڵەتی سەبارەت بە داهاتووی دۆزی فەڵەستین، فوئاد حوسێن، وەزیری دەرەوەی عێراق بە سەردانێک گەیشتە نیویۆرک.

چیرۆکی سەرەکی: سعوودیە و فەرەنسا ئامادەکاری دەکەن بۆ سەرۆکایەتیکردنی کۆنفڕانسی نێودەوڵەتیی تایبەت بە چارەسەری ئاشتییانەی دۆزی فەڵەستین و جێبەجێکردنی "چارەسەری دوو دەوڵەت" لە ڕۆژانی 28 و 29ـی تەمموز. پێشتر بڕیاربوو ئەم کۆنفڕانسە لە مانگی حوزەیرانی ڕابردوودا لەلایەن نەتەوەیەکگرتووەکانەوە لە نیویۆرک میوانداری بکرێت، بەڵام لە چەند هەفتەی ڕابردوودا بەهۆی شەڕی نێوان ئیسرائیل و ئێرانەوە دواخرا.

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوە، " فوئاد حوسێن، جێگری سەرۆکوەزیران و وەزیری دەرەوەی عێراق، گەیشتە شاری نیویۆرک، بۆ بەشداریكردن لە كۆنفڕانسێكی نێودەوڵەتیی تایبەتدا كە تاوتوێی داهاتووی دۆزی فەڵەستین و پێشهاتە پەیوەندیدارەكانی دەكات لەسەر گۆڕەپانی هەرێمی و نێودەوڵەتی".

لە هەمان کاتدا: هەر بەگوێرەی ڕاگەیێنراوەکە، بەستنی كۆنفڕانسەكە "لە سۆنگەی زیادبوونی ئەو ئاڵنگارییانەوە دێت كە ڕووبەڕووی گەلی فەڵەستین دەبنەوە".

ئەوەی پێشبینی دەکرێت: بڕیارە وەزیری دەرەوە لە میانی سەردانەكەیدا، "ژمارەیەک دیدار و كۆبوونەوە لەگەڵ هاوتاكانی لە وەزیرانی دەرەوە و بەرپرسانی نێودەوڵەتی ئەنجام بدات، بەمەبەستی هەماهەنگیی كاری هاوبەش بۆ پاڵپشتیكردنی دۆزی فەڵەستین و بەهێزكردنی هەڵوێستی هاوبەشی عەرەبی و ئیسلامی لەناو ئۆرگانەكانی نەتەوە یەكگرتووەكاندا".