حووسییەکان وەک وەڵامێک بۆ دۆخی غەززە، هەنگاوی تووندتر ڕادەگەیەنن

ئاڤا نیوز

وتەبێژی هێزە یەمەنییەکانی سەر بە حووسییەکان لە یەمەن، هەنگاوی تووندتری دژی "ئیسرائیل" ڕاگەیاند، سەبارەت بە سیاسەتی برسیکردن لە کەرتی غەززە.

وێنە گەورەکە: ماوەی 21 مانگە جەنگ بەرۆکی کەرتی غەززەی گرتووە و سەرەڕای هەوڵە بەردەوامەکان، هێشتا ئاگربەستێکی هەمیشەیی بەدی نەهاتووە. ڕێگرییەکانی ئیسرائیل لە گەیشتنی هاوکارییە مرۆییەکان، نیگەرانیی نێودەوڵەتی لێکەوتووەتەوە و داواکارییەکان بۆ ڕێگەدان بە گەیاندنی هاوکاری بۆ ناوچەکە زیاتر بوون.

لێدوانی فەرمی: ئێوارەی ڕۆژی یەکشەممە، عەمید یەحیا سەریع، وتەبێژی حووسییەکان ڕایگەیاند: "هێزە چەکدارەکانی یەمەن بڕیاریانداوە ئۆپەراسیۆنە سەربازییە پاڵپشتییەکانیان تووندتر بکەنەوە و دەست بە جێبەجێکردنی قۆناغی چوارەمی گەمارۆی دەریایی لەسەر ئیسرائیل بکەن".

لەهەمان کاتدا: سەریع وتیشی: "ئەم قۆناغە بریتییە لە ئامانجگرتنی هەموو ئەو کەشتیانەی سەر بە هەر کۆمپانیایەکن کە مامەڵە لەگەڵ بەندەرەکانی ئیسرائیل دەکەن، بەبێ گوێدانە ڕەگەزنامەی ئەو کۆمپانیایە و لە هەر شوێنێک کە دەستی هێزە چەکدارەکانمانی پێ بگات".

ئەوەی پێویستە بیزانیت: ڕۆژی یەکشەممە 27ـی تەمموز، نووسینگەی ڕاگەیاندنی حکومی لە غەززە ڕایگەیاندبوو،  کەرتەکە بەدەست برسێتییەکی سەختەوە دەناڵێنێت، دۆخەکە 2.4 ملیۆن کەسی گرتووەتەوە، جەختیشیکردەوە کە ئەوەی ڕوودەدات شانۆگەرییەکی گاڵتەجاڕییە و کۆمەڵگەی نێودەوڵەتیش تێیدا هاوبەشە.