دادگای فیدراڵی دادبینی بۆ چەند دۆسیەیەک دەکات کە بەشێکیان پەیوەندییان بە هەرێمی کوردستانەوە هەیە

ئاڤا نیوز

بڕیارە ئەمڕۆ دووشەممە، دادگای باڵای فیدراڵیی عێراق دانیشتنێکی گرنگ ئەنجام بدات بۆ بڕیاردان لەسەر چارەنووسی سێ سکاڵای تایبەت بە هەرێمی کوردستان. دوو لە سکاڵاکان داوای مسۆگەرکردنی مووچەی فەرمانبەران و دوورخستنەوەی لە ململانێ سیاسییەکان دەکەن، سێیەمیشیان هەوڵێکە بۆ هەڵوەشاندنەوەی پرۆژەیەکی ستراتیژیی حکومەتی هەرێم بۆ دابینکردنی کارەبای 24 کاتژمێری.

ڕاگەیێنراوی فەرمی: بەگوێرەی خشتەی کاری دانیشتنەکەی ئەمڕۆی دادگای باڵای فیدراڵی، دادگا چاو بە دوو سکاڵای هاوشێوەدا دەخشێنێتەوە کە لەلایەن چەند هاووڵاتییەکەوە دژی سەرۆکوەزیران و وەزیری دارایی حکومەتی فیدراڵی تۆمارکراون. داواکاریی سەرەکی لەم دوو سکاڵایەدا بریتییە لە پابەندکردنی بەغدا بە ناردنی مووچەی فەرمانبەران، خانەنشینان و شایستە داراییەکانی دیکەی هەرێم مانگانە  لەکاتی خۆیدا،  هاوکات جەخت لەوە کراوەتەوە کە پێویستە پرسی مووچە لە ناکۆکی و ڕێککەوتنە سیاسییەکانی نێوان هەولێر و بەغدا جیا بکرێتەوە.

لەلایەکی دیکەوە: سکاڵایەکی دیکە کە لەلایەن سروە عەبدولواحید، ئەندامی ئەنجومەنی نوێنەران، دژی سەرۆکی هەرێم و سەرۆکی ئەنجوومەنی وەزیران تۆمار کراوە، ڕاستەوخۆ پرۆژەیەکی حکومەتی هەرێمی کوردستانی کردووەتە ئامانج. سکاڵاکە داوای هەڵوەشاندنەوەی بڕیاری حکومەت دەکات بۆ جێبەجێکردنی "پرۆژەی ڕووناکی" کە ئامانجی دابینکردنی کارەبای 24 کاتژمێرییە و ساڵانە بڕی 265 ملیار دیناری بۆ تەرخان کراوە.

ئەوەی پێویستە بیزانیت: دانیشتنی دادگا لەسەر ئەم سێ دۆسیەیە پێشتر چەند جارێک دواخراون، ئەمەش ئاماژەیە بۆ هەستیاری و گرنگیی بابەتەکان.