ئەو گەنجە کوردانەی لە لیبیا گیریان خواردبوو گەڕانەوە هەرێمی کوردستان

ئاڤا نیوز

ئەو 24 گەنجە کوردەی لە فڕۆکەخانەی بەنغازی لیبیا گیریان خواردبوو، ئەمڕۆ گەڕانەوە بۆ هەرێمی کوردستان.

وێنە گەورەکە: گەنجانی هەرێمی کوردستان و بەشێکی دیکەی وڵاتانی ناوچەکە بۆ گەیشتن بە کەناراوەکانی ئیتاڵیا و ئەوروپا ڕێگای لیبیا بەکاردەهێنن، لە ماوەی ڕابردوو چەند گەنجێکی کۆچبەری کورد بەو مەبەستە ڕوویان کردووەتە لیبیا، بە جۆرێک دەیان کەسیان لێ دەستگیر کراوە و ڕووبەڕووی تووندوتیژی و بارودۆخێکی نەخوازراو بوونەتەوە، بەشێکیشیان توانیویانە بگەنە کەناراوەکانی ئیتاڵیا.

لێدوانی فەرمی: عەلی خەلیفە، باوکی یەکێک لەو گەنجانە بە ئاڤای ڕاگەیاند: ئەو گەنجانە بە دوو فڕۆکەوە گەڕاونەتەوە هەولێر، نۆ کەسیان کاتژمێر 6:35 خولەکی بەڕێکەوتن و بەر لە کاتژمێر نۆ گەیشتن، فڕۆکەی دووەمیش دوای کاتژمیر نۆ گەیشتەوە فڕۆکەخانەکە.

زانیاریی زیاتر: ئاڤا پێشتر شوێنی مانەوەی ئەو 24 گەنجەی لەڕێگەی "ئەپڵ ئایدی" سەر موبایلی یەکێکیان ئاشکرا کرد، کە لە ئاسایشی گشتیی تەرابلووس بوون، دواتر ئاڤا د. ئەحمەد سەحاف، هەڵسوڕێنەری باڵیۆزخانەی عێراق لە لیبیا و لایەنە پەیوەندیدارەکانی لە دەستگیرکردنی گەنجەکان ئاگادار کردەوە، دوای هەوڵێکی زۆر ئازاد کران.

باکگراوند: بەیانی ڕۆژی یەکشەممە 2025-06-29، 24 گەنجی کوردستان بەرەو لیبیا بەڕێکەوتن، لە قاهیرەی میسر دابەزین و 30ـی مانگ چوونەتە بەنغازی لە لیبیا، لە 1ـی ئەم مانگە بەرەو تەرابلووس بەڕێکەوتن، لە نێوان میسراتە و ئەلخومس دەستگیر کراون.