ئەندامانی کۆمیسیۆنی پرۆسەی ئاشتی دیاریکران

ئاڤا نیوز

دوای ئەوەی سەرۆکایەتی پەرلەمانی تورکیا داوای لە فراکسیۆنەکانی کرد ناوی ئەندامەکانیان بنێرن، مەهەپە بەر لە هەموو پارتەکان ناوی ئەندامەکانی بۆ کۆمسیۆنەکە دیاری کرد، ناوی ئەندامانی دەم پارتیش دیاریکران، ئیی پارتی ڕەتی کردەوە ئەندامی لەو کۆمیسیۆنە هەبێت.

چیرۆکی سەرەکی: کۆمیسیۆنی پرۆسەی ئاشتی بۆ دانانی نەخشەڕێگەی پرۆسەکە لە پەرلەمانی تورکیا بە 51 ئەندام پێکهێنرا، نوعمان کورتوڵمووش، سەرۆکی پەرلەمانی تورکیا داوای لە فراکسیۆنەکان کرد ناوی ئەندامەکانیان بنێرن، تا 31ـی تەمموز کاتیان بۆ دانراوە.

زانیاریی زیاتر: مەهەپە وەک یەکەم پارت، ناوی ئەندامەکانی بۆ سەرۆکایەتی پەرلەمان نارد، دەم پارتیش کە چوار ئەندامی دەبێت، ناوی ئەندامەکانی دیاریکردن کە پێکهاتوون لە؛ گولستان کڵچ، سەرۆکی فراکسیۆنی دەم پارتی، مێراڵ دەنش بێشتاش، پەرلەمانتاری ئەرزڕوم،  سورحان ئۆڵوچ، پەرلەمانتاری ئەنتاڵیا، جێنگیز چیچێک، پەرلەمانتاری ئیستەنبووڵ.

ئیی پارتی کە دژی پرۆسەی ئاشتییە، ڕەتی کردەوە ناوی هیچ ئەندامێک بنێرێت و بەشداری لەو کۆمیسیۆنەی پەرلەمانی تورکیا بکات.

ژمارەکان وادەڵێن: کۆمیسیۆنەکە کە لە 51 ئەندام پێکدێت، ئەکەپە بە 21 ئەندام، جەهەپە بە 10 ئەندام، دەم پارتی و مەهەپە هەریەکەیان 4 ئەندام، و پارتی ئیی و یەنی یۆل هەریەکەیان 3 ئەندامیان دەبێت. هەروەها ئەو پارتانەی فراکسیۆنیان لە پەرلەمانی تورکیادا نییە، تەنیا یەک ئەندامیان لە کۆمیسیۆنەکەدا دەبێت.

ئەوەی پێویستە بیزانیت: بڕیار وایە لە سەرەتای مانگی 8 یەکەم دانیشتنی پەرلەمان بکرێت و کۆمیسیۆنەکە دەست بە کارەکانی بکات، لە 2025-10-01 پەرلەمان کە پشووی تەواو دەبێت پرۆسەی دەنگدان لەسەر پرۆژەیاسایەکە دەستپێدەکات و بە دەنگی 26 ئەندام پرۆژەکە پەسەند دەکرێت.