ژمارەی گیانلەدەستدانی ئاگرەکەی ئاویەری شاری سنەی ڕۆژهەڵاتی کوردستان بەرز دەبێتەوە

ئاڤا نیوز

دوو ژینگەپارێزی دیكە دوای ئەوەی لە هەوڵی كوژاندنەوەی ئاگرەكەی شاخی ئاویەر بەشێكی زۆری جەستەیان دەسووتێت، بەهۆی سەختی برینەكانیان، لە نەخۆشخانەی كەوسەری شاری سنە گیانیان سپارد.


چیرۆكی سەرەكی: ڕۆژی پێنجشەممە 24ـی تەمموزی 2025، ئاگرێكی گەورە لە شاخی ئاویەر لە شاری سنە كەوتەوە، چیاكۆ یوسفی نەژاد، ژینگەدۆستی ڕۆژهەڵاتی كوردستان، لە هەوڵی كوژاندنەوەی ئاگرەكە لەگەڵ شەش چالاكوانی دیكەی ژینگەی خەڵكی سنە، بەشێکی جەستەیان سووتا.

چی ڕوویدا: لەگەڵ بڵاوبوونەوەی هەواڵی گیانلەدەستدانی ئەو ژینگە پارێزە، شەوی ڕابردوو خەڵكانێكی زۆر لەبەردەم نەخۆشخانەی كەوسەری شاری سنە گردبوونەوە، بە وتنەوەی دروشمی "شەهید نامرێت" هەستی خۆیان گۆڕی بۆ هەڵوێست وەرگرتن.

ئەوەی پێویستە بیزانیت: خەبات ئەمینی، كە بەیانی ئەمڕۆ دووشەممە گیانی لەدەستدا، سێیەمین چالاکوانی ژینگەی ڕۆژهەڵاتی کوردستانە کە ئەمساڵ گیانیان بۆ پاراستنی ژینگەی کوردستان بەخت کردووە؛ ڕۆژی هەینیی ڕابردووش، حەمید مورادی، بەڕێوەبەری ڕێکخراوی نۆژینی شنەی کوردستان بەهۆی سەختی سووتانەکەیەوە گیانی لەدەستدا، شەوی ڕابردووش چیاكۆ یوسفی نەژاد بووەم دووەم قوربانیی ژینگە.


زانیاریی بەدەستهاتوو: فوئاد حەقیقی، پەیامنێری ئاڤا لە ڕۆژهەڵاتی كوردستان، بەپشتبەستن بە زانیاریی چالاكوانانی بواری ژینگە، ئاماژە بەوە دەكات، لە ساڵانی ڕابردوودا لە ڕۆژهەڵاتی کوردستاندا 17 هاووڵاتی لەپێناو پاراستنی ژینگەدا گیانیان سپاردووە كە چواردە كەس لە قوربانییان، لەکاتی کوژاندنەوەی ئاگری دارستانەکاندا بووە.

باكگراوند: ساڵانە دەیان هێتکار لە دارستانەکانی ڕۆژهەڵاتی کوردستان دەسووتێنرێن یان خەڵکی بەرژەوەندیخواز دەیانبڕنەوە. چالاکوانانی ژینگە، پاراستنی ئەم سامانە نیشتمانییەیان کردووەتە ئەرکی سەرشانیان، تەنانەت ئەگەر باجەکەشی بەختکردنی گیانی خۆیان بێت.