خاوەن کۆمپانیایەک: مادەیەکم هێناوەتە کوردستان کە ڕێگری لە سووتان دەکات

ئاڤا نیوز

خاون کۆمپانیایەک ماددەیەکی هێناوەتە هەرێمی کوردستان و دەڵێت ئەو ماددەیە ڕێگری لە تەقینەوەی تانکی سووتەمەنی ئۆتۆمبێل دەکات، بەرگریی شارستانیش هۆشداری دەدات لە مەترسی بەکارهێنانی ئەو مادەیە.

چیرۆکی سەرەکی: خاوەن کۆمپانیایەک مادەیەکی هێناوەتە هەرێمی کوردستان و بانگەشەی ئەوە دەکات کاتێک ئەو ماددەیە دەخەیتە ناو تانکی سووتەمەنی بەنزینخانە یان ئۆتۆمبێل، ڕێگری لە تەقینەوەی تانکی سووتەمەنییەکە دەکات.

لێدوانی فەرمی: عەلی بالیسانی، خاوەنی ئەو کۆمپانیایە کە ماددەکەی هێناوە، بە ئاڤامیدیای گوت: ئەو ماددەیەم لە وڵاتی نەمسا هێناوە، ماددەکە ناوی ئەکسسە  و دژی تەقینەوەیە،  کاتێک ئەو ماددەیە دەخەیتە ناو تانکی سووتەمەنی ناهێڵێت ئەو تانکییە بتەقێتەوە تا ئەو کاتەی ئاگرکوژێنەوە دێت.

- ئەو کۆمپانیایەی ئەو ماددەیە بەکاردەهێنێت و گەرەنتی کردووە گرێبەستی لەگەڵ ناتۆ هەیە و لە زریپۆشی هەمەر و تانکی لیوۆپارد و لە هەموو بەنزینخانەکانی نەمسا و ئەڵمانیا بەکاردێت.

- ماددەکە ڕێژەی بەهەڵمبوونی بەنزین لە 33% کەم دەکاتەوە.

پەیوەست بەم بابەتە: ئەرسەلان مەولوود، خاوەن سێرڤسی ئۆتۆمبێل بە ئاڤامیدیای گوت: بەکارهێنانی ئەو بەرهەمە ترسناکە، دەبێت حکومەت ڕێگەپێدانی پێبدات ئینجا بەکاربهێنرێت.

- بۆ کەمکردنەوەی ڕێژەی بەهەڵمبوونی بەنزین زیاتر لە 12 ساڵە ژمارەیەک مادەی ڕۆنی ئۆتۆمبێل و هیدرۆلیکمان هێناوەتە هەرێمی کوردستان، بەڵام هیچ ماددەیەک نیە ڕێگری لە سووتان بکات.

- هیچ ماددەیەک نیە گرەنتی ئەوە بکات ئۆتۆمبێل ئاگر نەگرێت، بەکار‌هێنان و تاقیکردنەوەی ئەو ماددەیە دەبێت بە مۆڵەتی فەرمی بێت و لەژێر چاودێری حکومەت بێت.

- ئەو ئۆتۆمبێلانەی لە دەرەوە هاوردە دەکرێن، بڕێکی زۆر کەم بەنزینی تێدایە و غازی تەبریدیش بەتاڵ دەکرێتەوە، ئەگەر ئەو ماددە گرنگە هەیە بۆ ئەوان بەکاری ناهێنن.

لەلایەکی دیکەوە: مقەدەم شاخەوان سەعید، وتەبێژی بەرگریی شارستانیی هەولێر بە ئاڤامیدیای گوت: هەر مادەیەک هاوردە دەکرێت دەبێت لەڕێگەی کوالێتی کۆنترۆل بێت و کۆمپانیاکانیش باوەڕپێکراو و فەرمی بن.

- ئێمە لەگەڵ ئەوە نین ئەو ماددەیە بەکار بێت، چونکە مۆڵەتی نیە و مەترسی ئەوەی لێدەکرێت بەکارهێنانی کارەساتی لێبکەوێتەوە.

- دەبێت ئەو لە وەزارەتی ناوخۆ و سامانە سرووشتییەکان مۆڵەت وەربگرێت.

- ئەگەر هەیە ئەو ماددەیە گازی ژەهراوی دەربدات، بۆیە دەبێت ئەو ماددەیە ڕێگەپێدانی هەموو لایەنە پەیوەندیدارەکان وەربگرێت.