لە عێراق حیزبێکی نوێ ڕاگەیێنرا کە تەواوی ئەندامەکانی ئافرەتن

ئاڤا نیوز

کۆمیسیۆنی هەڵبژاردنەکانی عێراق، لە بەغدا مۆڵەتی بە حیزبێک بەخشی کە سەرجەم ئەندامەکانی لە ئافرەتان پێکهاتوون و وەک خۆیان دەڵێن، بەشداریی لە هەڵبژاردنەکان دەکەن و دەیانەوێت ئافرەتان لە دروستکردنی بڕیاری سیاسی لە ئاستی وڵاتدا بەشداربن.

وێنە گەورەکە: حیزبی مەوەدە هەرچەندە دوو ساڵە خۆی ڕاگەیاندووە بەڵام بەهۆی ئەوەی ڕێکارەکانی وەرگرتنی مۆڵەتی تەواونەکردبوو، بۆیە بەشداری هەڵبژاردنەکانی ڕابردوو نەکردووە، ڕۆژی شەممەی ڕابردووش لە بەغدا کۆنگرەی دامەزراندنی بە ئامادەبوونی نوێنەری کۆمیسیۆنی هەڵبژاردنەکان بەست و بەفەرمی مۆڵەتی وەرگرت، جیاوازی ئەم حیزبەش ئەوەیە ئەندامەکانی هەر لە سەرۆک، سەرکردایەتی و پۆستە باڵاکان لەلایەن ئافرەتانەوە بەڕێوەدەبرێن.

لێدوانی فەرمی: جیهان تائی، سەرۆکی حیزبی مەوەدە لە کۆنگرەی دامەزراندنی حیزبەکەیدا قسەی کرد و ڕایگەیاند، سیاسەت تەنیا لەسەر پیاوان قۆرخ نەکراوە و ئافرەتان نابێت تەنیا بەشێک بن لە حیزبەکان، بەڵکو دەبێت سەرۆک و خاوەن بڕیاریش بن، وتیشی، ئومێدیان هەیە دوای هەڵبژاردنی کۆتایی ئەمساڵ، حیزبەکەیان ڕۆڵێکی چالاکی لە هەردوو دەسەڵاتی جێبەجێکردن و یاساداناندا هەبێت.

ئەندامەکانی حیزبی مەوەدەش قسەی خۆیان هەیە و دەڵێن، کات کاتی ئافرەتانە و پێویستە لە ناوەندی بڕیاری عێراقیدا ئافرەتان ڕۆڵێکی کارایان هەبێت، دەبێت ئیتر کۆتایی بە پەراوێزخستن، هەژارخستن، یاسای نادادپەروەر و دوورخستنەوەی ئافرەتان لە ناوەندی بڕیار بهێنرێت.