دوو شوێنەوار لە دهۆک نۆژەن دەکرێنەوە

ئاڤا نیوز

بەمەبەستی گرنگیدان بە کەلەپور و شوێنەوارەکان، وەزارەتی شارەوانی و گەشتوگوزاری حکومەتی هەرێمی کوردستان، دوو شوێنەوار لە دهۆک نۆژەن دەکاتەوە.

وێنە گەورەکە: لە چوارچێوەی گرنگیدانی کابینەی نۆیەمی حکومەتی هەرێمی کوردستان بە پێگە شوێنەوارییەکان و زیادکردنی شوێنی شوێنەواریی لە هەرێمی کوردستان، لەسەر داهاتی وەزارەتی شارەوانی و گەشتوگوزار دەست بە پرۆژەی نۆژەنکردنەوەی هەردوو "قەسرێن دلبێ و کەمەلانی - کەمبەلاند" لە پارێزگای دهۆک کرا.

لێدوانی فەرمی: د. بێکەس بریفکانی، بەڕێوەبەری شوێنەوار و کەلەپوری دهۆک بۆ ئاڤا نیوز گوتی: ئەو پڕۆژەیە بە سەرپەرشتیی بەڕێوەبەرایەتیی شوێنەوار و کەلەپووری دهۆک و بە چاودێریی بەڕێوەبەرایەتیی گشتیی شوێنەوار و کەلەپوور لە وەزارەتی شارەوانی و گەشتوگوزار جێبەجێ دەکرێت. 

ئەوەی پێویستە بیزانیت: قەسرا کەمبەلانی - کەمبەلاند، یەکێکە لە شوێنە شوێنەوارە گرنگەکان و دەکەوێتە سەنتەری شاری دهۆک، تەلارسازییەکی دێرینە و لە ساڵی 1927 دروستکراوە؛ قەسرا دلبێ، دەکەوێتە گوندی دلبێ سەر بە قەزای سێمێل، بەشێوازێکی جیاواز لەڕووی بیناسازی و تەلارسازییەوە، لە نێوان ساڵانی 1900 - 1905 دروستکراوە.